ന്യൂഡൽഹി: മദ്യനയ അഴിമതിക്കേസിൽ ജാമ്യത്തിലായിരുന്ന കേജരിവാൾ ഇന്ന് ജയിലിലേക്ക് മടങ്ങും. സുപ്രീംകോടതി അനുവദിച്ച ഇടക്കാല ജാമ്യം അവസാനിച്ചതിനാലാണ് ഡൽഹി മുഖ്യമന്ത്രി അരവിന്ദ് കേജരിവാൾ ഇന്ന് ജയിലിലേക്ക് മടങ്ങുന്നത് .
21 ദിവസത്തെ ഇടക്കാല ജാമ്യമാണ് തെരഞ്ഞെടുപ്പ് പ്രചാരണത്തിനായി കേജരിവാളിന് കോടതി അനുവദിച്ചത്. ആരോഗ്യപ്രശ്നങ്ങൾ ചൂണ്ടിക്കാട്ടി ജാമ്യ കാലാവധി നീട്ടണമെന്ന് ആവശ്യപ്പെട്ടിരുന്നെങ്കിലും സുപ്രീംകോടതി പരിഗണിച്ചിരുന്നില്ല.
വിചാരണക്കോടതിയെ സമീപിച്ചിരുന്നെങ്കിലും കേസ് മാറ്റിവെക്കുകയായിരുന്നു. കഴിഞ്ഞ മാർച്ച് 21നാണ് എൻഫോഴ്സ്മെന്‍റ് ഡയറക്ടറേറ്റ് കേ‍ജരിവാളിനെ അറസ്റ്റ് ചെയ്തത്.
മേയ് 10നാണ് ഇടക്കാല ജാമ്യം ലഭിച്ച കേജരിവാൾ പുരത്തിറങ്ങുന്നതും ഇന്ത്യാ മുന്നണിയുടെ തെരെഞ്ഞെടുപ്പ് പ്രചാരണത്തിൽ സജീവമാകുന്നതും. സുപ്രീംകോടതി ജൂൺ രണ്ടിന് ജയിലിലേക്ക് മടങ്ങണമെന്ന് കേജരിവാളിനോട് നിർദേശിച്ചിരുന്നു. അതടിസ്ഥാനത്തിലാണ് കേജരിവാൾ ഇന്ന് ജയിലിലേക്ക് മടങ്ങുന്നത്.
