ഹായിൽ: സൗദി ഈസ്റ്റ് കലാലയം സാംസ്കാരികവേദി സംഘടിപ്പിച്ച പതിനാലാമത് എഡിഷൻ പ്രവാസി സാഹിത്യോത്സവിനു ഹൈലിൽ ഉജ്ജ്വല പരിസമാപ്തി. രണ്ടുമാസം വിവിധ ഘടകങ്ങളിൽ നടന്ന തുടർ മത്സരങ്ങൾക്ക് ശേഷമാണ് സൗദി ഈസ്റ്റ് നാഷനൽ സാഹിത്യോത്സവിന് ഹൈലിലെ ഖസ്ർ ലയാലി ഓഡിറ്റോറിയത്തിൽ കൊടിയിറങ്ങിയത്. സൗദി സെൻട്രൽ ഭാഗത്തുനിന്നും കിഴക്കൻ മേഖലയിൽ നിന്നുമുള്ള പത്ത് സോണുകൾ തമ്മിൽ നടന്ന മത്സരത്തിൽ 225 പോയിന്റുകൾ ദമ്മാം സോൺ പതിനാലാം എഡിഷൻ സാഹിത്യോത്സവിന്റെ കലാകിരീടം സന്ത്വമാക്കി. യഥാക്രമം റിയാദ് നോർത്ത് , റിയാദ് സിറ്റി സോണുകൾക്കാണ് രണ്ടും മൂന്നും സ്ഥാനങ്ങൾ.
അൽ ജൗഫിൽ നിന്നെത്തിയ സൽമാൻ കണ്ണൂർ സാഹിത്യോത്സവിലെ കലാപ്രതിഭയും അൽ ഖസീമിലെ സുഫിയാൻ ഇർഫാനി സർഗപ്രതിഭയായും തിരഞ്ഞെടുക്കപ്പെട്ടു. രാവിലെ പ്രധാന വേദിയിൽവെച്ച് സാഹിത്യോൽസവിന്റെ ഔപചാരിക ഉൽഘാടനം എസ് എസ് എഫ് മുൻ സ്റ്റേറ് പ്രസിഡന്റ് പി കെ എം സഖാഫി ഇരിങ്ങല്ലൂർ നിർവഹിച്ചു. അൽജൗഫ്, ഹായിൽ, ഖസീം, റിയാദ് നോർത്ത്, റിയാദ് സിറ്റി, ദമ്മാം, അൽഖോബാർ, അൽ അഹ്സ, ജുബൈൽ, തബൂക്ക്, ഹഫർ അൽ ബാത്തിൻ എന്നീ സോണുകളിൽ നിന്നായി വനിതകൾ ഉൾപ്പെടെ 800 അധികം മത്സരാർഥികൾ പങ്കെടുത്ത സാഹിത്യോത്സവ് ജനകീയത കൊണ്ടും സംഘാടനം കൊണ്ടും ശ്രദ്ധേയമായി.
വൈകിട്ട് 4 മണിമുതൽ നടന്ന സാംസ്കാരിക സമ്മേളനത്തിൽ സാഹിത്യോത്സവ് ഉദ്‌ഘോഷിക്കുന്ന പ്രമേയം ‘മണ്ണും മണലും ‘ എന്ന വിഷയത്തെ അധികരിച്ച് രിസാല സ്റ്റഡി സർക്കിൽ ഗ്ലോബൽ പ്രതിനിധി സലിം പട്ടുവം സംസാരിച്ചു. രിസാല സ്റ്റഡി സർക്കിൾ സൗദി ഈസ്റ്റ് നാഷനൽ ചെയർമാൻ ഇബ്‌റാഹീം അംജദിയുടെ അധ്യക്ഷതയിൽ നടന്ന സമ്മേളനം പ്രവാസി രിസാല എഡിറ്റർ ജാബിർഅലി പത്തനാപുരം ഉൽഘാടനം ചെയ്തു. ഹായിൽ പ്രവാസത്തിലെ വിവിധ സാമൂഹിക സാംസ്കാരിക ബിസിനസ് രംഗത്തെ പ്രമുഖർ പങ്കെടുത്തു . 10 വേദികളിലായി നടന്ന സാഹിത്യോത്സവ് സമയ ക്രമീകരണം കൊണ്ടും മത്സര ഇനങ്ങളുടെ വൈവിധ്യം കൊണ്ടും ശ്രദ്ധിക്കപ്പെട്ടു. സമാപനത്തിൽ നടന്ന സമ്മാനദാന ചടങ്ങ് സ്വാഗത സംഘം ചെയർമാൻ ഹമീദ് സഖാഫിയുടെ അദ്ധ്യക്ഷ്യതയിൽ ഐ സി എഫ് സൗദി നാഷണൽ പ്രതിനിധി അബു സ്വാലിഹ് മുസ്ലിയാർ ഉൽഘാടന കർമ്മം നിർവ്വഹിച്ചു.
അടുത്തവർഷം ജുബൈലിൽ നടക്കുന്ന സാഹിത്യോത്സവ് 2025 ന്റെ പ്രഖ്യാപനം രിസാല സ്റ്റഡി സർക്കിൾ മുൻ ഗ്ലോബൽ ചെയർമാൻ അബ്ദുറഹ്മാൻ സഖാഫി ചെബ്രശ്ശേരി നിർവഹിച്ചു . ഗ്ലോബൽ സെക്രട്ടറിമാരായ ഉമർ അലി കോട്ടക്കൽ, അഹ്‌മദ്‌ കബീർ ചേളാരി, അൻസാർ കൊട്ടുകാട് തുടങ്ങിയവർ വിജയികൾക്കുള്ള ട്രോഫി വിതരണം ചെയ്തു ബഷീർ സഅദി, അഫ്സൽ കായംകുളം, ചാൻസ അബ്ദുൽറഹ്മാൻ, ഷുഹൈബ് കോനിയത്, മുസമ്മിൽ,നൗഫൽ പറക്കുന്ന്, തുടങ്ങിയ പ്രാസ്ഥാനിക രംഗത്തെ പ്രമുഖർ സംബന്ധിച്ചു . രിസാല സ്റ്റഡി സർക്കിൾ നാഷനൽ ജനറൽ സെക്രട്ടറി അമീൻ ഓച്ചിറ സ്വാഗതവും സ്വാഗത സംഘം കൺവീനർ ബഷീർ നല്ലളം നന്ദിയും പറഞ്ഞു.
റിപ്പോർട്ട് – അഫ്സൽ കായംകുളം.
