ന്യൂഡൽഹി: ആർ‌എസ്‌എസിന്റെ ശതാബ്ദി ആഘോഷത്തിന്റെ ഭാഗമായി തപാൽ സ്റ്റാമ്പും നാണയവും പുറത്തിറക്കിയത് ഭരണഘടനയ്ക്കേറ്റ ഗുരുതരമായ പരിക്കും അപമാനവുമാണെന്ന് കമ്മ്യൂണിസ്റ്റ് പാർട്ടി ഓഫ് ഇന്ത്യ (മാർക്സിസ്റ്റ്) വിശേഷിപ്പിച്ചു. ആർ‌എസ്‌എസ് പ്രോത്സാഹിപ്പിക്കുന്ന ഒരു ഹിന്ദു ദേവതയുടെ ‘ഭാരത് മാതാ’ ചിത്രം ഒരു ഔദ്യോഗിക നാണയത്തിൽ പകർത്തുന്നത് അങ്ങേയറ്റം പ്രതിഷേധാർഹമാണെന്ന് സിപിഐ (എം) പോളിറ്റ്ബ്യൂറോ പ്രസ്താവനയിൽ പറഞ്ഞു. റിപ്പബ്ലിക് ദിന പരേഡിൽ യൂണിഫോം ധരിച്ച ആർ‌എസ്‌എസ് വളണ്ടിയർമാരെ ചിത്രീകരിച്ച തപാൽ സ്റ്റാമ്പും ചരിത്രത്തെ വ്യാജമാക്കുന്നതാണെന്ന് പ്രസ്തവാന കൂട്ടിച്ചേർത്തു.
ഹിന്ദുത്വ രാഷ്ട്രം എന്ന വിഭാഗീയ ആശയത്തിന്റെ പ്രതീകമായി ആർ‌എസ്‌എസ് പ്രോത്സാഹിപ്പിക്കുന്ന ഒരു ഹിന്ദു ദേവതയുടെ ‘ഭാരത് മാതാ’ ചിത്രം ഒരു ഔദ്യോഗിക നാണയത്തിൽ പകർത്തുന്നത് അങ്ങേയറ്റം പ്രതിഷേധാർഹമാണ്. 1963 ലെ റിപ്പബ്ലിക് ദിന പരേഡിൽ പങ്കെടുക്കാൻ നെഹ്‌റു ആർ‌എസ്‌എസിനെ ക്ഷണിച്ചത് ഇന്ത്യ-ചൈന യുദ്ധസമയത്ത് അവരുടെ ദേശസ്‌നേഹത്തിന്റെ അംഗീകാരമായിട്ടാണെന്ന നുണയെ അടിസ്ഥാനമാക്കിയുള്ള പരേഡിന്റെ ചിത്രം കാണിച്ച തപാൽ സ്റ്റാമ്പും ചരിത്രത്തെ വ്യാജമാക്കുന്നു.
1963 ലെ റിപ്പബ്ലിക് ദിന പരേഡ് അടിസ്ഥാനപരമായി ഒരു ലക്ഷത്തിലധികം പൗരന്മാരുടെ ഒരു വലിയ സമ്മേളനമായിരുന്നുവെന്ന് തെളിവുകൾ തെളിയിക്കപ്പെട്ടിട്ടുണ്ട്. യൂണിഫോം ധരിച്ച ആർ‌എസ്‌എസ് വളണ്ടിയർമാരുടെ സാന്നിധ്യം, റിപ്പോർട്ട് ചെയ്യപ്പെടാത്തതും ആകസ്മികവുമായിരുന്നു. ഇടതുപക്ഷ പ്രസ്തവാന പറഞ്ഞു.
ബ്രിട്ടീഷ് തന്ത്രമായ ഭിന്നിപ്പിച്ച് ഭരിക്കുക എന്നതിനെ ശക്തിപ്പെടുത്തുകയും, കൊളോണിയൽ ഭരണത്തിനെതിരായ പോരാട്ടത്തിന്റെ നിർണായക ഘടകമായ ഇന്ത്യയിലെ ജനങ്ങളുടെ ഐക്യത്തെ ദുർബലപ്പെടുത്താൻ ശ്രമിക്കുകയും ചെയ്യുന്ന ആർ‌എസ്‌എസിന്റെ ലജ്ജാകരമായ പങ്ക് വെള്ളപൂശുക എന്നതാണ് സ്റ്റാമ്പും നാണയവയും ഇറക്കിയുള്ള മുഴുവൻ അഭ്യാസത്തിന്റെയും ലക്ഷ്യമെന്ന് പ്രസ്തവാനയിൽ പറഞ്ഞു.
ആർ എസ് എസ് സ്വാതന്ത്ര്യസമരത്തിൽ നിന്ന് അകലെയായിരുന്നു എന്ന് മാത്രമല്ല, സ്വതന്ത്ര ഇന്ത്യയുടെ ചരിത്രത്തിൽ ഉണ്ടായ ഏറ്റവും മോശമായ വർഗീയ അക്രമങ്ങളിൽ ഔദ്യോഗിക അന്വേഷണ കമ്മീഷനുകളുടെ നിരവധി റിപ്പോർട്ടുകളിൽ ആർ‌എസ്‌എസിന്റെ പങ്ക് വിശദമായി പ്രതിപാദിച്ചിട്ടുമുണ്ട്. മനുവാദി പ്രത്യയശാസ്ത്രങ്ങളുടെ പ്രചാരണത്തിലൂടെ ന്യൂനപക്ഷ സമുദായങ്ങളെയും സമൂഹത്തിലെ അരികുവൽക്കരിക്കപ്പെട്ട വിഭാഗങ്ങളെയും ആർ‌എസ്‌എസും അതിന്റെ പരിവാറും ലക്ഷ്യം വയ്ക്കുകയും ചെയ്യുന്നുണ്ട്.
പ്രധാനമന്ത്രി തന്റെ സ്ഥാനം ദുരുപയോഗം ചെയ്തുകൊണ്ട് , ആർ‌എസ്‌എസിന്റെ യാഥാർത്ഥ്യ ചരിത്രം മറച്ചുവെക്കാൻ ശ്രമിക്കുന്നതിലൂടെ, അദ്ദേഹം വഹിക്കുന്ന ഭരണഘടനാ പദവിയുടെ അന്തസ്സ് താഴ്ത്തിക്കെട്ടിയിരിക്കുന്നുവെന്നും പ്രസ്താവനയിൽ സി പി ഐ എം പറഞ്ഞു.
