മലപ്പുറം: മലപ്പുറം ജില്ലയുടെ വിവിധ ഭാഗങ്ങളിൽ കഴിഞ്ഞ ദിവസം രാത്രി നേരിയ ഭൂചലനം അനുഭവപ്പെട്ടു. രാത്രി 11.20-ഓടെയാണ് കോട്ടക്കൽ, വേങ്ങര, ഇരിങ്ങല്ലൂർ, ഊരകം തുടങ്ങിയ പ്രദേശങ്ങളിൽ പ്രകമ്പനമുണ്ടായത്. ഏതാനും സെക്കൻഡുകൾ മാത്രം നീണ്ടുനിന്ന ഭൂചലനത്തോടൊപ്പം വലിയ മുഴക്കവും കേട്ടതായി നാട്ടുകാർ പറഞ്ഞു. അപ്രതീക്ഷിതമായി അനുഭവപ്പെട്ട പ്രകമ്പനത്തിൽ ജനങ്ങൾ പരിഭ്രാന്തരായെങ്കിലും എവിടെയും നാശനഷ്ടങ്ങളൊന്നും റിപ്പോർട്ട് ചെയ്തിട്ടില്ല.
അതേസമയം, ഇത് വലിയ തോതിലുള്ള ഭൂചലനമല്ലെന്നും തീവ്രത കുറഞ്ഞ പ്രകമ്പനം മാത്രമാണെന്നുമാണ് ഔദ്യോഗിക വിശദീകരണം. ഭൂമിക്കടിയിലെ നേരിയ മാറ്റങ്ങളാകാം ഇത്തരം ശബ്ദത്തിനും കുലുക്കത്തിനും കാരണമായതെന്ന് അധികൃതർ സൂചിപ്പിച്ചു. ആശങ്കപ്പെടേണ്ട സാഹചര്യമില്ലെന്ന് അറിയിച്ച ഭരണകൂടം, ജനങ്ങൾ ജാഗ്രത പാലിക്കണമെന്നും നിർദ്ദേശിച്ചു. ഭൂചലനത്തെക്കുറിച്ചുള്ള കൂടുതൽ വിവരങ്ങൾ ശേഖരിക്കാൻ ബന്ധപ്പെട്ട വകുപ്പുകൾ പരിശോധന നടത്തിവരികയാണ്.
