തിരുവനന്തപുരം: കേരളത്തോടുള്ള കേന്ദ്ര സർക്കാരിന്റെ സാമ്പത്തിക വിവേചനത്തിനെതിരെ മുഖ്യമന്ത്രി പിണറായി വിജയന്റെ നേതൃത്വത്തിൽ നടന്ന പ്രതിഷേധ സത്യഗ്രഹത്തിൽ നിന്ന് കേരള കോൺഗ്രസ് (എം) ചെയർമാൻ ജോസ് കെ. മാണി വിട്ടുനിന്നു. തിരുവനന്തപുരം രക്തസാക്ഷി മണ്ഡപത്തിൽ നടന്ന പ്രതിഷേധത്തിൽ എൽ.ഡി.എഫിലെ പ്രമുഖ നേതാക്കളെല്ലാം അണിനിരന്നപ്പോഴാണ് മുന്നണിയിലെ പ്രധാന ഘടകകക്ഷി നേതാവായ ജോസ് കെ. മാണിയുടെ അസാന്നിധ്യം ശ്രദ്ധിക്കപ്പെട്ടത്. വ്യക്തിപരമായ അസൗകര്യങ്ങൾ കാരണമാണ് അദ്ദേഹം പങ്കെടുക്കാതിരുന്നത് എന്നാണ് ഔദ്യോഗിക വിശദീകരണമെങ്കിലും രാഷ്ട്രീയ കേന്ദ്രങ്ങളിൽ ഇത് ചർച്ചയായിട്ടുണ്ട്.
സംസ്ഥാനത്തെ സാമ്പത്തികമായി ശ്വാസംമുട്ടിക്കുന്ന കേന്ദ്ര നയങ്ങൾക്കെതിരെ ഭരണപക്ഷത്തെ എം.എൽ.എമാരും മന്ത്രിമാരും ഒത്തുകൂടിയ വേദിയിൽ ജോസ് കെ. മാണിയുടെ അഭാവം പ്രതിപക്ഷം രാഷ്ട്രീയ ആയുധമാക്കുന്നുണ്ട്. മുന്നണിക്കുള്ളിലെ വിയോജിപ്പാണോ അതോ മറ്റെന്തെങ്കിലും കാരണമാണോ വിട്ടുനിൽക്കലിന് പിന്നിലെന്ന് രാഷ്ട്രീയ നിരീക്ഷകർ ഉറ്റുനോക്കുന്നു. അതേസമയം, പാർട്ടിയെ പ്രതിനിധീകരിച്ച് മറ്റ് നേതാക്കൾ സത്യഗ്രഹത്തിൽ പങ്കെടുത്തതായും കേരള കോൺഗ്രസ് (എം) എൽ.ഡി.എഫ് സമരത്തിനൊപ്പമാണെന്നും പാർട്ടി വൃത്തങ്ങൾ അറിയിച്ചു.
