പാരീസ്/ബെർലിൻ : ഗാസയിൽ വെടിനിർത്തൽ കരാറുകൾ നിലവിലുണ്ടെങ്കിലും ഇസ്രായേൽ സൈന്യം ആക്രമണം തുടരുന്നതിനെതിരെ യൂറോപ്യൻ നഗരങ്ങളിൽ പ്രതിഷേധം ഇരമ്പുന്നു. ജർമ്മൻ തലസ്ഥാനമായ ബെർലിനിലും ഫ്രഞ്ച് നഗരമായ പാരീസിലും ആയിരക്കണക്കിന് ആളുകളാണ് തെരുവിലിറങ്ങിയത്. ‘ഫ്രീ ഫലസ്തീൻ’ മുദ്രാവാക്യങ്ങളുമായി പ്രതിഷേധക്കാർ നഗരമധ്യത്തിൽ മാർച്ച് നടത്തി. ഇസ്രായേലിന്റെ സൈനിക നടപടികൾ ഉടൻ അവസാനിപ്പിക്കണമെന്നും ഗാസയിലെ വംശഹത്യക്ക് യൂറോപ്യൻ രാജ്യങ്ങൾ കൂട്ടുനിൽക്കരുതെന്നും പ്രതിഷേധക്കാർ ആവശ്യപ്പെട്ടു.
വെടിനിർത്തൽ കരാർ ലംഘിച്ചുകൊണ്ട് ഗാസയിലെ അഭയാർത്ഥി ക്യാമ്പുകൾക്ക് നേരെ ഇസ്രായേൽ തുടരുന്ന ബോംബാക്രമണങ്ങളിൽ നിരവധി സിവിലിയന്മാർ കൊല്ലപ്പെടുന്ന സാഹചര്യത്തിലാണ് ഈ പ്രതിഷേധം. ഇസ്രായേലിന് ആയുധങ്ങൾ നൽകുന്നത് നിർത്തലാക്കണമെന്ന് ആവശ്യപ്പെട്ട് ബെർലിനിൽ നടന്ന മാർച്ചിൽ ജർമ്മൻ സർക്കാരിനെതിരെയും രൂക്ഷവിമർശനം ഉയർന്നു. പാരീസിലും സമാനമായ രീതിയിൽ വലിയ ജനപങ്കാളിത്തത്തോടെ പ്രതിഷേധ പരിപാടികൾ നടന്നു. ഗാസയിലെ ജനങ്ങൾക്ക് മാനുഷിക സഹായം എത്തിക്കുന്നതിനുള്ള തടസ്സങ്ങൾ നീക്കണമെന്നും അന്താരാഷ്ട്ര സമൂഹം ഇടപെട്ട് ശാശ്വതമായ സമാധാനം ഉറപ്പാക്കണമെന്നും പ്രതിഷേധക്കാർ ഒരേസ്വരത്തിൽ ആവശ്യപ്പെട്ടു.
