ദുബൈ: ഇറാന് ചുറ്റുമുള്ള സമുദ്രമേഖലയിൽ അമേരിക്കൻ യുദ്ധക്കപ്പലുകളുടെയും അത്യാധുനിക യുദ്ധവിമാനങ്ങളുടെയും അസാധാരണമായ സൈനിക വിന്യാസം നടക്കുന്നതായി റിപ്പോർട്ട്. ഇറാനുമായുള്ള സംഘർഷം പുതിയ തലത്തിലേക്ക് നീങ്ങുന്നതിനിടെയാണ് യുഎസ് ഈ കടുത്ത സൈനിക നീക്കം നടത്തുന്നത്. ഈ പ്രദേശത്തെ യുഎസ് സൈനിക നീക്കങ്ങൾ നിരീക്ഷിക്കുന്ന സ്വതന്ത്ര ഏജൻസികളാണ് വിമാനവാഹിനിക്കപ്പലുകളും ഡിസ്ട്രോയറുകളും ഉൾപ്പെടെയുള്ള വൻ വ്യൂഹം ഇറാൻ അതിർത്തിക്ക് സമീപം നിലയുറപ്പിച്ചതായി കണ്ടെത്തിയത്. മേഖലയിലെ സമാധാനാന്തരീക്ഷത്തെ ഭയപ്പെടുത്തുന്ന രീതിയിലാണ് അമേരിക്കയുടെ ഈ നീക്കമെന്ന് ബിബിസി റിപ്പോർട്ട് ചെയ്യുന്നു.
ഇറാനിൽ നിന്നുള്ള സാധ്യമായ ഭീഷണികളെ നേരിടാനാണ് ഈ നീക്കമെന്ന് അമേരിക്ക അവകാശപ്പെടുന്നുണ്ടെങ്കിലും, സൈനിക വിന്യാസത്തിന്റെ വ്യാപ്തി ഒരു വലിയ യുദ്ധത്തിനുള്ള തയ്യാറെടുപ്പാണെന്ന സൂചനയാണ് നൽകുന്നത്. വിമാനവാഹിനി ക്കപ്പലുകൾക്ക് പുറമെ എഫ്-35 തുടങ്ങിയ അത്യാധുനിക പോർവിമാനങ്ങളെയും മേഖലയിൽ വിന്യസിച്ചിട്ടുണ്ട്. ഇറാന്റെ എണ്ണക്കപ്പലുകൾക്കും മറ്റ് തന്ത്രപ്രധാന കേന്ദ്രങ്ങൾക്കും നേരെ ആക്രമണം ഉണ്ടായേക്കാമെന്ന ഭീതി നിലനിൽക്കുന്നു. ഈ സാഹചര്യം പശ്ചിമേഷ്യയിൽ വലിയ അസ്ഥിരതക്ക് കാരണമാകുമെന്ന് അന്താരാഷ്ട്ര നിരീക്ഷകർ മുന്നറിയിപ്പ് നൽകുന്നു. അതേസമയം, തങ്ങളുടെ പരമാധികാരത്തിന് നേരെയുള്ള ഏത് വെല്ലുവിളിയെയും ശക്തമായി നേരിടുമെന്ന് ഇറാനും വ്യക്തമാക്കിയിട്ടുണ്ട്.
