റിയാദ്: സൗദി അറേബ്യയുടെ പരമാധികാര നിക്ഷേപ നിധിയായ പബ്ലിക് ഇൻവെസ്റ്റ്മെന്റ് ഫണ്ട് (PIF), അമേരിക്കൻ ഓഹരി വിപണിയിലുള്ള തങ്ങളുടെ നിക്ഷേപത്തിൽ വലിയ കുറവ് വരുത്തി. 2025-ന്റെ മൂന്നാം പാദത്തിൽ 19.4 ബില്യൺ ഡോളറായിരുന്ന ഓഹരി മൂല്യം നാലാം പാദം അവസാനിച്ചതോടെ 12.9 ബില്യൺ ഡോളറായാണ് കുറഞ്ഞത്. യുഎസ് സെക്യൂരിറ്റീസ് ആൻഡ് എക്സ്ചേഞ്ച് കമ്മീഷന് സമർപ്പിച്ച റിപ്പോർട്ടിലാണ് ഈ വിവരങ്ങളുള്ളത്. ലൂസിഡ് ഗ്രൂപ്പ് (Lucid Group), ഇലക്ട്രോണിക് ആർട്സ് (Electronic Arts), ഊബർ ടെക്നോളജീസ് (Uber Technologies) ഉൾപ്പെടെ അഞ്ച് കമ്പനികളിലാണ് നിലവിൽ പി.ഐ.എഫിന് പ്രധാന നിക്ഷേപങ്ങളുള്ളത്.
സൗദി അറേബ്യയുടെ ‘വിഷൻ 2030’-ന്റെ ഭാഗമായി സമ്പദ്വ്യവസ്ഥയെ എണ്ണയിതര മേഖലകളിലേക്ക് വൈവിധ്യവത്കരിക്കുന്നതിന്റെ പശ്ചാത്തലത്തിലാണ് ഈ പുനഃക്രമീകരണം. ആഭ്യന്തരമായും അന്തർദ്ദേശീയമായും മൂലധനം വിന്യസിക്കുന്നതിൽ പി.ഐ.എഫ് കേന്ദ്രസ്ഥാനത്താണ്. 2025-ൽ ലോകത്തിലെ ഏറ്റവും സജീവമായ പരമാധികാര നിക്ഷേപ നിധിയായി പി.ഐ.എഫ് മാറിയിരുന്നു. ഏകദേശം 36.2 ബില്യൺ ഡോളറാണ് കഴിഞ്ഞ വർഷം മാത്രം പുതിയ നിക്ഷേപങ്ങൾക്കായി ഫണ്ട് വിനിയോഗിച്ചത്. നിക്ഷേപ മേഖലകളിലെ മുൻഗണനകളിൽ മാറ്റം വരുത്തുന്നതിന്റെ സൂചനയായാണ് അമേരിക്കൻ ഓഹരി വിപണിയിലെ ഈ പിന്മാറ്റത്തെ നിക്ഷേപകർ വിലയിരുത്തുന്നത്.
