റിയാദ്: വിശുദ്ധ റമദാൻ മാസത്തിൽ ഉംറ തീർഥാടകരുടെയും യാത്രക്കാരുടെയും വൻ തിരക്ക് കണക്കിലെടുത്ത് സൗദി അറേബ്യയിലെ വിമാനത്താവളങ്ങൾ സജ്ജമായതായി മാറ്റാറാത്ത് (MATARAT) ഹോൾഡിംഗ് അറിയിച്ചു. രാജ്യത്തെ 27 വിമാനത്താവളങ്ങളുടെ പ്രവർത്തനങ്ങൾ നിയന്ത്രിക്കുന്ന മാറ്റാറാത്ത്, തീർഥാടകർക്ക് സുഗമവും വേഗത്തിലുള്ളതുമായ യാത്രാനുഭവം ഉറപ്പാക്കുന്നതിനായി വിപുലമായ തയ്യാറെടുപ്പുകളാണ് പൂർത്തിയാക്കിയിരിക്കുന്നത്. ഉംറ സീസണിന്റെ ഏറ്റവും തിരക്കേറിയ സമയമായതിനാൽ, യാത്രക്കാരുടെ ഒഴുക്ക് നിയന്ത്രിക്കാനും നടപടിക്രമങ്ങൾ വേഗത്തിലാക്കാനും അത്യാധുനിക ഡിജിറ്റൽ സംവിധാനങ്ങളും സാങ്കേതിക വിദ്യകളും വിന്യസിച്ചിട്ടുണ്ട്.
വിമാനത്താവളങ്ങളിലെ സുരക്ഷാ ക്രമീകരണങ്ങൾ ശക്തിപ്പെടുത്തുന്നതിനൊപ്പം അടിയന്തര സാഹചര്യങ്ങൾ നേരിടാനുള്ള പ്രോട്ടോക്കോളുകളും പരിഷ്കരിച്ചിട്ടുണ്ട്. ടെർമിനലുകളിലെ യാത്രക്കാരുടെ തിരക്ക് കുറക്കുന്നതിനായി ഫീൽഡ് മോണിറ്ററിംഗ് സംവിധാനം ശക്തമാക്കി. സൗദി വിഷൻ 2030-ന്റെ ലക്ഷ്യങ്ങൾക്ക് അനുസൃതമായി വിമാനത്താവളങ്ങളിലെ അടിസ്ഥാന സൗകര്യങ്ങൾ വികസിപ്പിക്കുകയും സേവനങ്ങളുടെ ഗുണനിലവാരം ഉയർത്തുകയും ചെയ്യുകയാണ് ഈ നീക്കത്തിലൂടെ ലക്ഷ്യമിടുന്നത്. റമദാൻ മാസത്തിൽ വിമാനത്താവളങ്ങളിൽ എത്തുന്നവർക്ക് യാതൊരുവിധ തടസ്സങ്ങളുമില്ലാതെ തങ്ങളുടെ യാത്ര പൂർത്തിയാക്കാൻ ആവശ്യമായ എല്ലാ സഹായങ്ങളും 24 മണിക്കൂറും ലഭ്യമാകുമെന്നും അധികൃതർ വ്യക്തമാക്കി.
