തിരുവനന്തപുരം: സംസ്ഥാനത്ത് പി.എസ്.സി പരീക്ഷകൾക്ക് അപേക്ഷിക്കാനുള്ള പ്രായപരിധി സർക്കാർ വർധിപ്പിച്ചു. ജനറൽ വിഭാഗത്തിന്റെ പ്രായപരിധി നിലവിലുള്ള 36-ൽ നിന്ന് 40 വയസ്സായാണ് ഉയർത്തിയത്. എസ്.സി, എസ്.ടി വിഭാഗങ്ങളിലുള്ളവർക്ക് 45 വയസ്സുവരെയും ഒ.ബി.സി വിഭാഗത്തിന് 43 വയസ്സുവരെയും പരീക്ഷ എഴുതാൻ സാധിക്കും. നിയമസഭാ സമ്മേളനത്തിന് ശേഷം ചേർന്ന കാബിനറ്റ് യോഗത്തിലാണ് ഈ നിർണ്ണായക തീരുമാനം കൈക്കൊണ്ടത്. ജെ.ബി കോശി കമ്മീഷൻ റിപ്പോർട്ടിലെ ശുപാർശകൾ പരിഗണിച്ചാണ് സർക്കാരിന്റെ ഈ നടപടി.
പങ്കാളിത്ത പെൻഷൻ നടപ്പിലാക്കിയ ശേഷം സർവീസിൽ പ്രവേശിച്ചവരുടെ വിരമിക്കൽ പ്രായം 60 ആയി ഉയർത്തിയ സാഹചര്യത്തിലാണ് പി.എസ്.സി നിയമനങ്ങളിലും ഇളവ് നൽകാൻ തീരുമാനിച്ചത്. നേരത്തെ എംപ്ലോയ്മെന്റ് എക്സ്ചേഞ്ച് വഴിയുള്ള നിയമനങ്ങളുടെ പ്രായപരിധി ജനറൽ കാറ്റഗറിയിൽ 40 വയസ്സായി വർധിപ്പിച്ചിരുന്നു. ഇതിന് ആനുപാതികമായ മാറ്റമാണ് ഇപ്പോൾ പി.എസ്.സി പരീക്ഷകളിലും കൊണ്ടു വന്നിരിക്കുന്നത്. പ്രായപരിധി അവസാനിച്ചതിനാൽ അവസരം നഷ്ടപ്പെടുമായിരുന്ന നിരവധി ഉദ്യോഗാർഥികൾക്ക് സർക്കാരിന്റെ ഈ തീരുമാനം വലിയ ആശ്വാസമാകും.
