ടെഹ്റാൻ: ഇറാൻ പരമോന്നത നേതാവ് ആയത്തുല്ല അലി ഖാംനഈയുടെ വിയോഗത്തിന് കാരണമായ സംയുക്ത സൈനിക നീക്കത്തിന് പിന്നാലെ അമേരിക്കൻ, ഇസ്രായേൽ നേതൃത്വങ്ങൾക്കെതിരെ രൂക്ഷവിമർശനവുമായി ഇറാൻ പാർലമെന്റ് സ്പീക്കർ മുഹമ്മദ് ബാഗർ ഖാലിബാഫ്. ഇരുരാജ്യങ്ങളിലെയും ഭരണാധികാരികൾ ‘അപകടകാരികളായ കുറ്റവാളികൾ’ ആണെന്നും അവർ വരും ദിവസങ്ങളിൽ വിനാശകരമായ പ്രഹരങ്ങൾ നേരിടേണ്ടി വരുമെന്നും അദ്ദേഹം മുന്നറിയിപ്പ് നൽകി. ഞായറാഴ്ച ടെലിവിഷനിലൂടെ നടത്തിയ പ്രസംഗത്തിലാണ് സ്പീക്കർ ഇറാന്റെ ഔദ്യോഗിക നിലപാട് വ്യക്തമാക്കിയത്. തങ്ങളുടെ ചുവന്ന രേഖകൾ ലംഘിച്ചവർ അതിനുള്ള വലിയ വില നൽകേണ്ടി വരുമെന്ന് അദ്ദേഹം ഓർമ്മിപ്പിച്ചു.
ഖാംനഈയുടെ മരണത്തിന് ശേഷം ഇറാനിലെ സ്ഥിതിഗതികൾ അതീവ സങ്കീർണ്ണമായി തുടരുകയാണ്. ഏത് തരത്തിലുള്ള പ്രത്യാക്രമണങ്ങളെയും നേരിടാൻ രാജ്യം സജ്ജമാണെന്നും ശത്രുരാജ്യങ്ങൾ മാപ്പപേക്ഷിക്കുന്ന സാഹചര്യം ഉണ്ടാകുമെന്നും ഖാലിബാഫ് അവകാശപ്പെട്ടു. അതേസമയം, ഇറാന്റെ ഭാഗത്തുനിന്ന് കൂടുതൽ പ്രകോപനങ്ങൾ ഉണ്ടായാൽ മുമ്പൊരിക്കലും കണ്ടിട്ടില്ലാത്ത വിധത്തിലുള്ള ശക്തമായ തിരിച്ചടി നൽകുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകിയിട്ടുണ്ട്. പശ്ചിമേഷ്യയിലെ സൈനിക താവളങ്ങൾക്കും വ്യോമ പ്രതിരോധ കേന്ദ്രങ്ങൾക്കും നേരെ ഇസ്രായേൽ ആക്രമണം തുടരുന്നതിനിടെയാണ് ഇറാന്റെ ഭാഗത്തുനിന്നുള്ള ഈ കടുത്ത പ്രതികരണം
