കലബുറഗി (കർണാടക): അമേരിക്കൻ പ്രസിഡന്റ് ഡൊണാൾഡ് ട്രംപ് എപ്സ്റ്റീൻ ഫയലുകൾ ഉപയോഗിച്ച് പ്രധാനമന്ത്രി നരേന്ദ്ര മോദിയെ ബ്ലാക്ക്മെയിൽ ചെയ്യുകയാണെന്ന് കോൺഗ്രസ് ദേശീയ അധ്യക്ഷൻ മല്ലികാർജുൻ ഖാർഗെ. ട്രംപ് ഒരു ഏകാധിപതിയാണെന്നും പ്രധാനമന്ത്രി മോദി അദ്ദേഹത്തിന്റെ അടിമയെപ്പോലെയാണ് പെരുമാറുന്നതെന്നും അദ്ദേഹം ആരോപിച്ചു. കർണാടകയിലെ ചിറ്റാപൂരിൽ നടന്ന പൊതുയോഗത്തെ അഭിസംബോധന ചെയ്ത് സംസാരിക്കുകയായിരുന്നു ഖാർഗെ. എപ്സ്റ്റീൻ ഫയലുകളിലെ വിവരങ്ങൾ പുറത്തുവിടുമെന്ന ഭയത്താൽ പ്രധാനമന്ത്രി മൗനം പാലിക്കുകയാണെന്നും ട്രംപ് ഇന്ത്യയെ തന്റെ വിരൽത്തുമ്പിൽ നിയന്ത്രിക്കുകയാണെന്നും അദ്ദേഹം കുറ്റപ്പെടുത്തി.
അന്താരാഷ്ട്ര വിഷയങ്ങളിൽ ഇന്ത്യയുടെ സ്വതന്ത്രമായ നിലപാടുകൾ പണയപ്പെടുത്തിയതായും ഖാർഗെ വിമർശിച്ചു. ഇറാനിലെ പരമോന്നത നേതാവ് ആയത്തുല്ല അലി ഖാംനഈ കൊല്ലപ്പെട്ട സംഭവത്തിലും വെനിസ്വേലൻ പ്രസിഡന്റ് നിക്കോളാസ് മഡുറോയ്ക്കെതിരെയുള്ള യുഎസ് നീക്കങ്ങളിലും കേന്ദ്ര സർക്കാരിന്റെ മൗനം ഇതിന് തെളിവാണെന്ന് അദ്ദേഹം പറഞ്ഞു. റഷ്യയിൽ നിന്ന് എണ്ണ വാങ്ങാൻ അമേരിക്കയുടെ അനുമതി തേടേണ്ടി വരുന്നത് ഇന്ത്യയുടെ തന്ത്രപരമായ സ്വയംഭരണാധികാരം വാഷിംഗ്ടണിന് മുന്നിൽ കീഴടക്കുന്നതിന് തുല്യമാണെന്നും, രാജ്യത്തെ വീണ്ടും അടിമത്തത്തിലേക്ക് കൊണ്ടുപോകാനാണോ സർക്കാർ ശ്രമിക്കുന്നതെന്നും അദ്ദേഹം ചോദിച്ചു.
അമേരിക്കയുമായുള്ള പുതിയ വ്യാപാര കരാർ ഇന്ത്യൻ കർഷകർക്ക് വലിയ തിരിച്ചടിയാണെന്നും ഖാർഗെ ചൂണ്ടിക്കാട്ടി. പല കാർഷിക ഉൽപ്പന്നങ്ങൾക്കും ഇറക്കുമതി തീരുവ ചുമത്താൻ കഴിയാത്ത സാഹചര്യം ഇന്ത്യയെ സാമ്പത്തികമായി ദോഷകരമായി ബാധിക്കും. മോദി സർക്കാർ തന്റെ വ്യക്തിപരമായ സംരക്ഷണത്തിന് വേണ്ടി രാജ്യത്തിന്റെ താൽപ്പര്യങ്ങൾ ബലികഴിക്കുകയാണെന്നും ഖാർഗെ ആരോപിച്ചു. എന്നാൽ, ഈ ആരോപണങ്ങളെ കേന്ദ്ര സർക്കാർ പൂർണ്ണമായും തള്ളിക്കളഞ്ഞു. ഒരു കുറ്റവാളിയുടെ ജല്പനങ്ങൾ മാത്രമാണിതെന്നും അങ്ങേയറ്റത്തെ അവജ്ഞയോടെ ഇത്തരം വാദങ്ങളെ തള്ളുന്നുവെന്നും സർക്കാർ വക്താക്കൾ പ്രതികരിച്ചു.
