അങ്കാറ: തുർക്കിയുടെ വ്യോമാതിർത്തി ലംഘിക്കുന്ന ഇറാൻ നടപടിക്കെതിരെ കടുത്ത മുന്നറിയിപ്പുമായി തുർക്കി പ്രസിഡന്റ് റജബ് തയ്യിബ് എർദോഗൻ. ഒരു കാരണവശാലും വ്യോമാതിർത്തി ലംഘിക്കുന്നത് ന്യായീകരിക്കാനാവില്ലെന്ന് ഇറാൻ പ്രസിഡന്റ് മസൂദ് പെസെഷ്കിയാനുമായി നടത്തിയ ടെലിഫോൺ സംഭാഷണത്തിൽ അദ്ദേഹം വ്യക്തമാക്കി. രാജ്യത്തിന്റെ പരമാധികാരത്തിന് മേലുള്ള ഇത്തരം കടന്നുകയറ്റങ്ങൾ ഗൗരവകരമായി കാണുമെന്നും തുർക്കിയുടെ സുരക്ഷാ താത്പര്യങ്ങൾ സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കുമെന്നും എർദോഗൻ പറഞ്ഞു. മേഖലയിൽ വർദ്ധിച്ചുവരുന്ന സംഘർഷങ്ങൾക്കിടയിൽ ഇത്തരം പ്രകോപനങ്ങൾ സ്ഥിതിഗതികൾ കൂടുതൽ വഷളാക്കുമെന്നും അദ്ദേഹം കൂട്ടിച്ചേർത്തു.
മേഖലയിലെ സുരക്ഷയും സ്ഥിരതയും നിലനിർത്തുന്നതിൽ ഇരുരാജ്യങ്ങൾക്കും തുല്യ ഉത്തരവാദിത്തമുണ്ടെന്ന് സംഭാഷണത്തിനിടെ എർദോഗൻ ഓർമ്മിപ്പിച്ചു. ഇറാനും തുർക്കിയും തമ്മിലുള്ള ഉഭയകക്ഷി ബന്ധങ്ങളിൽ വിള്ളലുണ്ടാക്കാൻ ഇത്തരം സംഭവങ്ങൾ കാരണമാകുമെന്ന് അദ്ദേഹം ആശങ്ക പ്രകടിപ്പിച്ചു. അതേസമയം, മിസൈൽ, ഡ്രോൺ ആക്രമണങ്ങൾക്കിടയിൽ ഇത്തരം ലംഘനങ്ങൾ ഉണ്ടാകാതിരിക്കാൻ ജാഗ്രത പാലിക്കണമെന്നും അദ്ദേഹം ആവശ്യപ്പെട്ടു. ഇറാനിലെ നിലവിലെ സാഹചര്യങ്ങളും പശ്ചിമേഷ്യയിലെ സംഘർഷങ്ങളും ചർച്ച ചെയ്ത എർദോഗൻ, നയതന്ത്ര മര്യാദകൾ പാലിച്ചുകൊണ്ട് മാത്രമേ മുന്നോട്ട് പോകാനാവൂ എന്ന് ഇറാൻ ഭരണകൂടത്തെ അറിയിച്ചു.
