തിരുവനന്തപുരം: വരാനിരിക്കുന്ന നിയമസഭാ തിരഞ്ഞെടുപ്പിനുള്ള 55 സ്ഥാനാർത്ഥികൾ ഉൾപ്പെട്ട ആദ്യഘട്ട പട്ടിക കോൺഗ്രസ് പ്രഖ്യാപിച്ചു. സിറ്റിംഗ് എം.എൽ.എമാരിൽ ഭൂരിഭാഗം പേരെയും നിലനിർത്തിക്കൊണ്ടാണ് പട്ടിക തയ്യാറാക്കിയിരിക്കുന്നത്. മുൻപ് പാർട്ടിയിൽ നിന്ന് പുറത്തായ രാഹുൽ മാങ്കൂട്ടത്തിൽ പ്രതിനിധീകരിച്ചിരുന്ന പാലക്കാട് മണ്ഡലത്തിൽ പ്രശസ്ത കലാകാരൻ രമേഷ് പിഷാരടി സ്ഥാനാർത്ഥിയാകും. കെ. ബാബു ഒഴിഞ്ഞ തൃപ്പൂണിത്തുറ, വിവാദങ്ങൾ നിലനിൽക്കുന്ന കണ്ണൂർ, പെരുമ്പാവൂർ എന്നിവിടങ്ങളിൽ അന്തിമ തീരുമാനമായിട്ടില്ലെങ്കിലും സുൽത്താൻ ബത്തേരിയിൽ ഐ.സി. ബാലകൃഷ്ണന്റെ പേര് സമിതി അംഗീകരിച്ചു.
പ്രമുഖ നേതാക്കളായ വി.ഡി. സതീശൻ (പറവൂർ), രമേശ് ചെന്നിത്തല (ഹരിപ്പാട്), തിരുവഞ്ചൂർ രാധാകൃഷ്ണൻ (കോട്ടയം) എന്നിവർ തങ്ങളുടെ സിറ്റിംഗ് സീറ്റുകളിൽ തന്നെ മത്സരിക്കും. കെ. മുരളീധരൻ വട്ടിയൂർക്കാവിലും വി.ടി. ബൽറാം തൃത്താലയിലും ടി.എൻ. പ്രതാപൻ മണലൂരിലും ജനവിധി തേടും. പുതുപ്പള്ളിയിൽ ചാണ്ടി ഉമ്മൻ, ബിന്ദു കൃഷ്ണ (കൊല്ലം), ജ്യോതികുമാർ ചാമക്കാല (പത്തനാപുരം), വി.പി. സജീന്ദ്രൻ (കുന്നത്തുനാട്), ടി. സിദ്ദിഖ് (കൽപറ്റ), മാത്യു കുഴൽനാടൻ (മൂവാറ്റുപുഴ), പി.സി. വിഷ്ണുനാഥ് (കുണ്ടറ) തുടങ്ങിയവരും പട്ടികയിലുണ്ട്. വിജയസാധ്യതയും പ്രാദേശിക സമവായങ്ങളും പരിഗണിച്ചാണ് ഈ പട്ടിക തയ്യാറാക്കിയിരിക്കുന്നതെന്ന് പാർട്ടി നേതൃത്വം അറിയിച്ചു.
