പാരിസ്/ബെയ്റൂത്ത്: ദക്ഷിണ ലെബനാൻ പിടിച്ചെടുക്കാനുള്ള കരസേനാ നീക്കങ്ങളിൽ നിന്ന് ഇസ്രായേൽ പിന്മാറണമെന്ന് ഫ്രാൻസ് ആവശ്യപ്പെട്ടു. അതിർത്തിയിൽ നിന്ന് ഏകദേശം 30 കിലോമീറ്റർ ഉള്ളിലായുള്ള ലിതാനി നദി വരെയുള്ള പ്രദേശം സൈന്യത്തിന്റെ നിയന്ത്രണത്തിലാക്കുമെന്ന് ഇസ്രായേൽ പ്രഖ്യാപിച്ചതിന് പിന്നാലെയാണ് ഫ്രഞ്ച് വിദേശകാര്യ മന്ത്രി ജീൻ നോയൽ ബാരോട്ട് മുന്നറിയിപ്പുമായി രംഗത്തെത്തിയത്. ഇത്തരം സൈനിക നീക്കങ്ങൾ വലിയ തോതിലുള്ള മാനുഷിക പ്രത്യാഘാതങ്ങൾ ഉണ്ടാക്കുമെന്നും ഇതിനകം തന്നെ തകർച്ചയിലായ ലെബനാന്റെ സാഹചര്യം കൂടുതൽ വഷളാക്കുമെന്നും അദ്ദേഹം എ.എഫ്.പിയോട് പറഞ്ഞു. സമാധാന ചർച്ചകൾക്ക് മുൻഗണന നൽകണമെന്നും മേഖലയിൽ കൂടുതൽ രക്തച്ചൊരിച്ചിൽ ഒഴിവാക്കണമെന്നും ഫ്രാൻസ് ആവശ്യപ്പെട്ടു.
ഇറാൻ പരമോന്നത നേതാവ് ആയത്തുള്ള അലി ഖമേനിയുടെ വധത്തിന് പ്രതികാരമായി മാർച്ച് 2-ന് ഹിസ്ബുള്ള ഇസ്രായേലിലേക്ക് റോക്കറ്റ് ആക്രമണം നടത്തിയതോടെയാണ് ലെബനാൻ ഈ യുദ്ധത്തിലേക്ക് വലിച്ചിഴയ്ക്കപ്പെട്ടത്. എന്നാൽ, നിലവിൽ ലെബനാൻ സർക്കാർ ഇറാന്റെ താല്പര്യങ്ങൾക്ക് വിരുദ്ധമായ കർശന നിലപാടാണ് സ്വീകരിക്കുന്നത്. ഇതിന്റെ ഭാഗമായി ലെബനാനിലെ ഇറാനിയൻ സ്ഥാനപതി മുഹമ്മദ് റെസ ഷെയ്ബാനിയുടെ അംഗീകാരം റദ്ദാക്കാനും അദ്ദേഹത്തെ പുറത്താക്കാനുമുള്ള ലെബനാന്റെ തീരുമാനത്തെ ഫ്രാൻസ് സ്വാഗതം ചെയ്തു. ലെബനാൻ സർക്കാരിന്റേത് ‘ധീരമായ നിലപാടാണെന്ന്’ വിശേഷിപ്പിച്ച ഫ്രഞ്ച് വിദേശകാര്യ മന്ത്രി, രാജ്യത്തെ പുതിയൊരു യുദ്ധത്തിലേക്ക് തള്ളിയിട്ടത് ഹിസ്ബുള്ളയാണെന്നും കുറ്റപ്പെടുത്തി.
ഇസ്രായേലിനെതിരെയുള്ള യുദ്ധത്തിൽ ഹിസ്ബുള്ളയുടെ പ്രവർത്തനങ്ങൾ നിയന്ത്രിക്കുന്നത് ഇറാന്റെ റെവല്യൂഷണറി ഗാർഡ്സ് (IRGC) ആണെന്ന് ലെബനാൻ സർക്കാർ തന്നെ വെളിപ്പെടുത്തിയിട്ടുണ്ട്. ഈ സാഹചര്യത്തിൽ അടുത്ത ഞായറാഴ്ചയ്ക്കുള്ളിൽ ഇറാനിയൻ സ്ഥാനപതി രാജ്യം വിടണമെന്നാണ് ബെയ്റൂട്ടിന്റെ ഉത്തരവ്. ലെബനന്റെ പരമാധികാരത്തെ മാനിക്കണമെന്നും വിദേശ ശക്തികൾ രാജ്യത്തിന്റെ ആഭ്യന്തര കാര്യങ്ങളിൽ ഇടപെടുന്നത് അവസാനിപ്പിക്കണമെന്നും അന്താരാഷ്ട്ര സമൂഹം ആവശ്യപ്പെട്ടു. യുദ്ധം നാലാം വാരത്തിലേക്ക് കടക്കുമ്പോൾ നയതന്ത്ര തലത്തിലും സൈനിക തലത്തിലും പശ്ചിമേഷ്യയിൽ വലിയ മാറ്റങ്ങളാണ് സംഭവിച്ചുകൊണ്ടിരിക്കുന്നത്.
