ദമ്മാം: സൗദി അറേബ്യയിലെ ദമ്മാം-റിയാദ് ഹൈവേയിലുണ്ടായ ദാരുണമായ വാഹനാപകടത്തിൽ വയനാട് സ്വദേശിനിയായ മലയാളി യുവതി മരിച്ചു. വൈത്തിരി സ്വദേശിനി ഹിദ നൗറിൻ (23) ആണ് ഒറൈറക്കടുത്തുള്ള ഉമ്മുൽ അറാറിൽ വെച്ച് നടന്ന അപകടത്തിൽ മരണപ്പെട്ടത്. ഒരാഴ്ച മുമ്പ് മാത്രം ദമ്മാമിൽ വെച്ച് വിവാഹിതരായ ദമ്പതികൾ, റിയാദിലുള്ള മാതാപിതാക്കളെ സന്ദർശിക്കാനായി യാത്ര ചെയ്യുന്നതിനിടെയാണ് അപകടം സംഭവിച്ചത്. ഇവർ സഞ്ചരിച്ചിരുന്ന വാഹനം നിയന്ത്രണം വിട്ട് മറിയുകയായിരുന്നു. ഹിദ നൗറിൻ സംഭവസ്ഥലത്ത് വെച്ച് തന്നെ മരണപ്പെട്ടു.
അപകടത്തിൽ പരിക്കേറ്റ ഹിദയുടെ ഭർത്താവ് യാസീനെ ഉടൻ തന്നെ ആശുപത്രിയിൽ പ്രവേശിപ്പിച്ചു. നിലവിൽ അദ്ദേഹം ചികിത്സയിലാണ്. നിയമപരമായ നടപടികൾ പൂർത്തിയാക്കിയ ശേഷം ഹിദ നൗറിന്റെ മൃതദേഹം സൗദി അറേബ്യയിൽ തന്നെ മറവ് ചെയ്യുമെന്ന് ബന്ധുക്കൾ അറിയിച്ചു. സന്തോഷകരമായ ഒരു കുടുംബജീവിതം ആരംഭിച്ച് ദിവസങ്ങൾക്കുള്ളിലുണ്ടായ ഈ വിയോഗം പ്രവാസി മലയാളി സമൂഹത്തിന് വലിയ നോവായി മാറിയിരിക്കുകയാണ്.
