കോഴിക്കോട്: മുസ്ലിം ലീഗിലെ സ്ഥാനാർഥി നിർണ്ണയത്തെച്ചൊല്ലിയുള്ള തർക്കം രൂക്ഷമായതിനെത്തുടർന്ന് വനിതാ ലീഗ് ദേശീയ ജനറൽ സെക്രട്ടറി സ്ഥാനത്തുനിന്നും മറ്റ് പാർട്ടി പദവികളിൽനിന്നും നൂർബീന റഷീദ് രാജിവെച്ചു. 2026-ലെ നിയമസഭാ തിരഞ്ഞെടുപ്പിനുള്ള പാർട്ടി സ്ഥാനാർഥി പട്ടികയിൽ വനിതാ ലീഗ് നേതാക്കളെ അവഗണിച്ചതിൽ പ്രതിഷേധിച്ചാണ് ഈ കടുത്ത തീരുമാനം. തന്റെ രാജിക്കത്ത് പാർട്ടി നേതൃത്വത്തിന് കൈമാറിയതായി അവർ അറിയിച്ചു. സംഘടനയ്ക്കായി ദീർഘകാലം പ്രവർത്തിച്ച വനിതാ നേതാക്കളെ തഴഞ്ഞതിലുള്ള കടുത്ത അതൃപ്തിയാണ് ഈ രാജിയിലൂടെ വ്യക്തമാകുന്നത്.
പേരാമ്പ്ര മണ്ഡലത്തിലെ യു.ഡി.എഫ് സ്ഥാനാർഥിയായി പ്രഖ്യാപിക്കപ്പെട്ട ഫാത്തിമ തഹ്ലിയ വനിതാ ലീഗിന്റെ പ്രതിനിധിയല്ലെന്ന് മുതിർന്ന നേതാവ് നൂർബീന റഷീദ് തുറന്നടിച്ചു. ഫാത്തിമ തഹ്ലിയയെ വനിതാ ലീഗിന്റെ അക്കൗണ്ടിൽ ഉൾപ്പെടുത്താൻ കഴിയില്ലെന്നും അവർ എം.എസ്.എഫ്, ഹരിത എന്നിവയുടെ ഭാഗമായാണ് പ്രവർത്തിച്ചിട്ടുള്ളതെന്നും നൂർബീന വ്യക്തമാക്കി. സ്ഥാനാർഥി നിർണ്ണയത്തിൽ വനിതാ ലീഗ് ഭാരവാഹികളെയും മുതിർന്ന നേതാക്കളെയും അവഗണിച്ചുവെന്ന പരാതി നിലനിൽക്കെയാണ് നേതൃത്വത്തെ പ്രതിരോധത്തിലാക്കി നൂർബീന റഷീദ് രംഗത്തെത്തിയത്.
തിരഞ്ഞെടുപ്പ് പ്രചാരണം സജീവമാകുന്ന ഘട്ടത്തിൽ മുതിർന്ന നേതാവിൽ നിന്നുണ്ടായ ഈ പരാമർശം യു.ഡി.എഫ് ക്യാമ്പിൽ വലിയ ചർച്ചകൾക്ക് വഴിവെച്ചിട്ടുണ്ട്. പേരാമ്പ്രയിൽ കന്നിയങ്കത്തിനിറങ്ങുന്ന ഫാത്തിമ തഹ്ലിയക്കെതിരെ പാർട്ടിക്കുള്ളിൽ നിന്നുതന്നെ ഉയർന്ന ഈ വിയോജിപ്പ് രാഷ്ട്രീയ പ്രതിയോഗികൾ ആയുധമാക്കാനുള്ള സാധ്യതയും നിലനിൽക്കുന്നു. വനിതാ പ്രാതിനിധ്യം ഉറപ്പാക്കുമ്പോൾ സംഘടനയ്ക്കായി ദീർഘകാലം പ്രവർത്തിച്ചവരെ പരിഗണിക്കണമെന്നാണ് നൂർബീനയുടെ പക്ഷം. എന്നാൽ, ഇത് സംബന്ധിച്ച് ഔദ്യോഗികമായി പ്രതികരിക്കാൻ ലീഗ് നേതൃത്വം തയ്യാറായിട്ടില്ല. പാർട്ടിക്കുള്ളിലെ ജനാധിപത്യപരമായ വിയോജിപ്പുകൾ പരിഹരിക്കപ്പെടുമെന്ന പ്രതീക്ഷയിലാണ് മുന്നണി പ്രവർത്തകർ.
