ലണ്ടൻ/വാഷിംഗ്ടൺ: പശ്ചിമേഷ്യൻ യുദ്ധത്തെത്തുടർന്ന് ഇറാൻ അടച്ചുപൂട്ടിയ ഹോർമുസ് കടലിടുക്ക് വീണ്ടും തുറക്കുന്നതിനായി ബ്രിട്ടന്റെ നേതൃത്വത്തിൽ 35 രാഷ്ട്രങ്ങളുടെ വിപുലമായ സഖ്യം രൂപീകരിച്ചു. ‘നോൺ-നാറ്റോ’ മാതൃകയിൽ രൂപീകരിച്ച ഈ സഖ്യത്തിൽ ഫ്രാൻസ്, ജർമ്മനി, ഇറ്റലി, കാനഡ, ജപ്പാൻ, യുണൈറ്റഡ് അറബ് എമിറേറ്റ്സ് തുടങ്ങിയ പ്രമുഖ രാജ്യങ്ങൾ ഉൾപ്പെടുന്നു. എന്നാൽ, കടലിടുക്ക് തുറക്കുന്നത് തങ്ങളുടെ ഉത്തരവാദിത്തമല്ലെന്നും അത് ഉപയോഗിക്കുന്ന രാജ്യങ്ങൾ തന്നെ നോക്കട്ടെ എന്നുമുള്ള പ്രസിഡന്റ് ഡൊണാൾഡ് ട്രംപിന്റെ നിലപാടിനെത്തുടർന്ന് അമേരിക്കയെ ഈ സഖ്യത്തിൽ നിന്നും ചർച്ചകളിൽ നിന്നും ഒഴിവാക്കി എന്നതാണ് ശ്രദ്ധേയം.
ബ്രിട്ടീഷ് വിദേശകാര്യ സെക്രട്ടറി വൈവെറ്റ് കൂപ്പറിന്റെ അധ്യക്ഷതയിൽ വ്യാഴാഴ്ച (ഏപ്രിൽ 2) നടന്ന വെർച്വൽ ഉച്ചകോടിയിൽ, കടലിടുക്ക് തുറക്കുന്നതിനായുള്ള നയതന്ത്ര-സൈനിക നീക്കങ്ങളെക്കുറിച്ച് ധാരണയായി. ഹോർമുസ് കടലിടുക്കിൽ ഇറാൻ സ്ഥാപിച്ചിട്ടുള്ള മൈനുകൾ നീക്കം ചെയ്യുക, ചരക്ക് കപ്പലുകൾക്ക് സൈനിക അകമ്പടി നൽകുക എന്നിവയാണ് സഖ്യത്തിന്റെ പ്രധാന ലക്ഷ്യങ്ങൾ. ലോകത്തെ എണ്ണ-വാതക വിതരണത്തിന്റെ അഞ്ചിലൊന്ന് കടന്നുപോകുന്ന ഈ പാത അടഞ്ഞുകിടക്കുന്നത് ആഗോള സമ്പദ്വ്യവസ്ഥയെ തടവിലാക്കുന്നതിന് തുല്യമാണെന്ന് ബ്രിട്ടീഷ് പ്രധാനമന്ത്രി കീർ സ്റ്റാമർ കുറ്റപ്പെടുത്തി. യുദ്ധം അവസാനിച്ചാലുടൻ കടലിടുക്ക് സുരക്ഷിതമാക്കുന്നതിനുള്ള നടപടികൾ ആരംഭിക്കുമെന്ന് അദ്ദേഹം വ്യക്തമാക്കി.
അമേരിക്കൻ സഹായമില്ലാതെ തന്നെ യൂറോപ്പിന്റെയും ഏഷ്യയുടെയും സുരക്ഷ ഉറപ്പാക്കാൻ തങ്ങൾക്ക് കഴിയുമെന്ന് തെളിയിക്കാനാണ് ഈ പുതിയ നീക്കത്തിലൂടെ ബ്രിട്ടനും സഖ്യകക്ഷികളും ലക്ഷ്യമിടുന്നത്. നിലവിൽ ഹോർമുസ് കടലിടുക്കിൽ കുടുങ്ങിക്കിടക്കുന്ന 2000-ത്തോളം കപ്പലുകളുടെയും 20,000-ത്തോളം ജീവനക്കാരുടെയും സുരക്ഷ ഉറപ്പാക്കാൻ ഈ സഖ്യം മുൻഗണന നൽകും. അതേസമയം, ഹോർമുസ് കടലിടുക്ക് തുറക്കാൻ സ്വന്തമായി ധൈര്യം കാണിക്കണമെന്ന ട്രംപിന്റെ പരിഹാസത്തിന്, അന്താരാഷ്ട്ര നിയമങ്ങൾ പാലിച്ച് ഉത്തരവാദിത്തത്തോടെ നീങ്ങാനാണ് തങ്ങളുടെ തീരുമാനമെന്ന് സഖ്യരാഷ്ട്രങ്ങൾ മറുപടി നൽകി.
