ടെഹ്റാൻ: പശ്ചിമേഷ്യയിൽ യുദ്ധസമാനമായ സാഹചര്യം തുടരുന്നതിനിടെ, അമേരിക്കൻ വ്യോമസേനയുടെ കരുത്തായ രണ്ടാമത്തെ എഫ്-35 സ്റ്റെൽത്ത് യുദ്ധവിമാനവും തങ്ങൾ വെടിവെച്ചിട്ടതായി ഇറാൻ സൈന്യം അവകാശപ്പെട്ടു. ഇറാന്റെ വ്യോമാതിർത്തി ലംഘിക്കാൻ ശ്രമിച്ച വിമാനത്തെ തങ്ങളുടെ പ്രതിരോധ സംവിധാനങ്ങൾ തകർക്കുകയായിരുന്നു എന്നാണ് റിപ്പോർട്ടുകൾ സൂചിപ്പിക്കുന്നത്. വിമാനം പൂർണ്ണമായും തകർന്നതായും അതിലുണ്ടായിരുന്ന പൈലറ്റ് രക്ഷപ്പെടാൻ സാധ്യതയില്ലെന്നും ഇറാൻ സൈനിക വൃത്തങ്ങൾ അറിയിച്ചു.
നേരത്തെ ഒരു എഫ്-35 വിമാനം കൂടി തങ്ങൾ തകർത്തിരുന്നതായി ഇറാൻ അവകാശപ്പെട്ടിരുന്നു. അത്യാധുനിക സുരക്ഷാ സംവിധാനങ്ങളുള്ള അമേരിക്കൻ യുദ്ധവിമാനങ്ങൾ തകർത്തെന്ന ഇറാന്റെ പുതിയ വെളിപ്പെടുത്തൽ അന്താരാഷ്ട്ര തലത്തിൽ വലിയ ചർച്ചകൾക്കാണ് വഴിതുറന്നിരിക്കുന്നത്. അതേസമയം, സംഭവത്തെക്കുറിച്ച് അമേരിക്കൻ പ്രതിരോധ മന്ത്രാലയം ഇതുവരെ ഔദ്യോഗികമായി പ്രതികരിച്ചിട്ടില്ല. ഇറാന്റെ ഈ നീക്കം മേഖലയിലെ സൈനിക സംഘർഷം കൂടുതൽ വഷളാക്കുമെന്ന ആശങ്കയിലാണ് ആഗോള സമൂഹം.
