റിയാദ്: അമേരിക്കയും ഇസ്രായേലും ഇറാനെതിരെ നടത്തുന്ന വ്യോമാക്രമണങ്ങൾ തുടരുന്നതിനിടെ, സൗദി അറേബ്യയും യുഎഇയും ഉൾപ്പെടെയുള്ള ഗൾഫ് രാജ്യങ്ങൾക്ക് നേരെ ഇറാൻ മിസൈൽ-ഡ്രോൺ ആക്രമണങ്ങൾ ശക്തമാക്കി. സൗദിയുടെ കിഴക്കൻ പ്രവിശ്യ ലക്ഷ്യമിട്ട് തൊടുത്തുവിട്ട ഏഴ് ബാലസ്റ്റിക് മിസൈലുകൾ പ്രതിരോധ സേന വെടിവെച്ചിട്ടതായും ഇവയുടെ അവശിഷ്ടങ്ങൾ പ്രമുഖ ഊർജ്ജ നിലയങ്ങൾക്ക് സമീപം പതിച്ചതായും സൗദി പ്രതിരോധ മന്ത്രാലയം അറിയിച്ചു. ഇറാഖിലെ കുർദിസ്ഥാൻ മേഖലയിലുണ്ടായ ഡ്രോൺ ആക്രമണത്തിൽ ദമ്പതികൾ കൊല്ലപ്പെട്ടു. ഇർബിൽ പ്രവിശ്യയിലെ സർഗസാവി ഗ്രാമത്തിലെ വീടിന് മുകളിലാണ് സ്ഫോടകവസ്തുക്കൾ നിറച്ച ഡ്രോൺ പതിച്ചത്. ഇതിന് പുറമെ യുഎഇയും ബഹ്റൈനും ഇറാന്റെ മിസൈൽ ഭീഷണിയെത്തുടർന്ന് വ്യോമപ്രതിരോധ സംവിധാനങ്ങൾ സജ്ജമാക്കുകയും അപായ സൂചനകൾ നൽകുകയും ചെയ്തിട്ടുണ്ട്.
ഹോർമുസ് കടലിടുക്ക് ചൊവ്വാഴ്ച രാത്രി എട്ട് മണിക്കുള്ളിൽ (EDT) പൂർണ്ണമായും തുറന്നുകൊടുത്തില്ലെങ്കിൽ ഇറാന്റെ അടിസ്ഥാന സൗകര്യങ്ങൾ ‘നരകതുല്യമായി’ തകർക്കുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് അന്ത്യശാസനം നൽകിയിരിക്കുകയാണ്. ചൊവ്വാഴ്ച അർദ്ധരാത്രിയോടെ ഇറാന്റെ ഓരോ പാലവും തകർക്കാനുള്ള പദ്ധതി തങ്ങളുടെ പക്കലുണ്ടെന്ന് ട്രംപ് മുന്നറിയിപ്പ് നൽകി. എന്നാൽ, സമ്മർദ്ദത്തിന് വഴങ്ങി പെട്ടെന്ന് കടലിടുക്ക് തുറക്കില്ലെന്ന നിലപാടിലാണ് ഇറാൻ. ഇതിനിടെ ചൊവ്വാഴ്ച പുലർച്ചെ ഇറാൻ തലസ്ഥാനമായ ടെഹ്റാനിൽ വീണ്ടും അമേരിക്കൻ-ഇസ്രായേൽ വ്യോമാക്രമണങ്ങൾ നടന്നതായി റിപ്പോർട്ടുകളുണ്ട്. ഗൾഫ് രാജ്യങ്ങളുടെ ഊർജ്ജ നിലയങ്ങളെ ലക്ഷ്യമിട്ടുള്ള ഇറാന്റെ നീക്കങ്ങളെ അന്താരാഷ്ട്ര സമൂഹം ശക്തമായി അപലപിച്ചു. ട്രംപിന്റെ സമയപരിധി അവസാനിക്കാൻ മണിക്കൂറുകൾ മാത്രം ബാക്കിനിൽക്കെ മേഖല അതീവ ഭീതിയിലാണ്.
