ജുബൈൽ: സൗദി അറേബ്യയിലെ ജുബൈൽ, യാമ്പു വ്യവസായ നഗരങ്ങളിലെ ആകെ നിക്ഷേപം 2025 അവസാനത്തോടെ 1.5 ട്രില്യൺ സൗദി റിയാൽ (400 ബില്യൺ ഡോളർ) കവിഞ്ഞതായി റോയൽ കമ്മീഷന്റെ വാർഷിക റിപ്പോർട്ട് വ്യക്തമാക്കുന്നു. സൗദിയെ ഒരു ആഗോള വ്യവസായ-ലോജിസ്റ്റിക് ഹബ്ബാക്കി മാറ്റാൻ ലക്ഷ്യമിട്ടുള്ള നാഷണൽ ഇൻഡസ്ട്രിയൽ ഡെവലപ്മെന്റ് ആൻഡ് ലോജിസ്റ്റിക് പ്രോഗ്രാമിന് (NIDLP) കീഴിലുള്ള പ്രധാന ചാലകശക്തിയായാണ് റോയൽ കമ്മീഷൻ പ്രവർത്തിക്കുന്നത്. ഖനനം, ഊർജ്ജം, ലോജിസ്റ്റിക്സ് എന്നീ മേഖലകളെ സംയോജിപ്പിച്ചുകൊണ്ട് രാജ്യത്തിന്റെ എണ്ണയിതര വരുമാനം വർദ്ധിപ്പിക്കാനും ആഗോളതലത്തിൽ സൗദി സമ്പദ്വ്യവസ്ഥയുടെ മത്സരക്ഷമത ഉയർത്താനുമുള്ള ദേശീയ വ്യാവസായിക തന്ത്രത്തിന്റെ ഭാഗമായാണ് ഈ വൻ നിക്ഷേപങ്ങൾ എത്തിയിരിക്കുന്നത്.
1975-ൽ സ്ഥാപിതമായ റോയൽ കമ്മീഷൻ, ഹൈഡ്രോകാർബൺ വിഭവങ്ങൾ കാര്യക്ഷമമായി പ്രയോജനപ്പെടുത്തി ജുബൈലിനെയും യാമ്പുവിനെയും അത്യാധുനിക വ്യവസായ നഗരങ്ങളായി വികസിപ്പിച്ചു. 1976-ൽ സാബിക് (SABIC) രൂപീകരിച്ചതോടെ പെട്രോകെമിക്കൽ മേഖലയിൽ ലോകശ്രദ്ധ നേടാൻ സൗദിക്ക് സാധിച്ചു. ജുബൈൽ വൻകിട വ്യവസായങ്ങളിലും പെട്രോകെമിക്കൽസിലും ശ്രദ്ധ കേന്ദ്രീകരിക്കുമ്പോൾ, ചെങ്കടൽ തീരത്തുള്ള യാമ്പു എണ്ണശുദ്ധീകരണ കേന്ദ്രമായും അനുബന്ധ പ്രക്രിയകളുടെ ഇടമായും പ്രവർത്തിക്കുന്നു.
നിലവിൽ വ്യവസായ മന്ത്രാലയത്തിന്റെയും മോദൻ (MODON), സൗദി ഇൻഡസ്ട്രിയൽ ഡെവലപ്മെന്റ് ഫണ്ട് (SIDF) തുടങ്ങിയ സ്ഥാപനങ്ങളുടെയും ഏകോപനത്തോടെയാണ് വ്യവസായ മേഖലയിലെ ഈ പരിവർത്തനം നടപ്പിലാക്കുന്നത്. രാജ്യത്തിന്റെ തന്ത്രപ്രധാനമായ ഭൂമിശാസ്ത്രപരമായ സ്ഥാനവും വിഭവസമൃദ്ധിയും സാമ്പത്തിക സ്ഥിരതയും പ്രയോജനപ്പെടുത്തി സുസ്ഥിരവും കരുത്തുറ്റതുമായ ഒരു വ്യവസായ സമ്പദ്വ്യവസ്ഥ കെട്ടിപ്പടുക്കാനുള്ള ശ്രമങ്ങളാണ് ഇപ്പോൾ നടന്നുവരുന്നത്.
