റിയാദ്: പുതു തലമുറയെ ലഹരിയിൽ നിന്നും മറ്റു ദുഷ് പ്രവണതയിൽ നിന്നും രക്ഷിക്കുന്നതിനായി റിയാദ് കെഎംസിസി മലപ്പുറം ജില്ലാ വെല്ഫിക് വിങ് സംഘടിപ്പിക്കുന്ന ലഹരി ബോധവൽക്കരണ ക്ലാസ് വെള്ളിയാഴ്ച നടക്കും. വൈകീട്ട് ഏഴ് മണിക്ക് ബത്ഹ നൂർ ഓഡിറ്റോറിയത്തിലാണ് പരിപാടി നടക്കുന്നത്.
മാറുന്ന കാലഘട്ടത്തിൽ കുട്ടികളെ വളർത്തുന്നതിലെ വെല്ലുവിളികൾ, ലഹരിയുടെ കടന്നു വരവും ആധുനിക ജീവിത ശൈലിയും സമൂഹത്തിൽ സൃഷ്ടിക്കുന്ന അപകടങ്ങൾ ക്ളാസിൽ ചർച്ച ചെയ്യും. മോഡേൺ പാരന്റിംഗിന്റെ പ്രാധാന്യവും യോഗത്തിൽ ചർച്ചയാവും.അന്താരാഷ്ട്ര ലഹരി വിരുദ്ധ കാമ്പയിൻ ‘റിസ’ യുടെ സ്കൂൾ ആക്ടിവിറ്റി കൺവീനർ പത്മിനി യു നായർ ഉത്ഘാടനം ചെയ്യും.
പ്രമുഖ പാരന്റിംഗ് ലൈഫ് കോച് സുഷമ ഷാൻ ക്ളാസ് നയിക്കും. മാനസികാരോഗ്യ സംരക്ഷണം, കുട്ടികളിലും മാതാപിതാക്കളിലും ആത്മവിശ്വാസം വളർത്തുന്ന വഴികൾ, ടെക്നോളജി കാലത്തെ മാതാപിതൃ ബന്ധങ്ങൾ, കുട്ടികളിലെ സംവേദനശേഷി വർധിപ്പിക്കൽ, പ്രായനുസൃത പഠനം, കുട്ടികൾക്ക് സ്വാതന്ത്ര്യവും അതിരുകളും നൽകുന്നതിലെ ശരിയായ മാർഗങ്ങൾ തുടങ്ങിയ വിഷയങ്ങളിൽ സുഷമ ഷാൻ സംസാരിക്കും.
