വെബ് ഡസ്‌ക്ക്: : ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു രാജിവെച്ചതായും
ഇസ്രായേലിൽ അടിയന്തരാവസ്ഥ പ്രഖ്യാപിച്ചതായും സോഷ്യൽ മീഡിയയിൽ തെറ്റായ വാർത്ത പ്രചരിക്കുന്നു. ഗാസയുമായി ബന്ധപ്പെട്ട സാഹചര്യങ്ങൾക്കിടയിൽ
ഇസ്രായേലിലെ ചാനൽ 12 ടെലിവിഷൻ നടത്തിയ സർവേയുടെ ഫലമാണ് തെറ്റായ രീതിയിൽ പ്രചരിക്കുന്നത്.
പ്രധാനമന്ത്രി ബെഞ്ചമിൻ നെതന്യാഹു ഉടൻ രാജിവയ്ക്കണമെന്ന് ഇസ്രായേലികളിൽ പകുതിയിലധികം പേരും വിശ്വസിക്കുന്നു എന്നതാണ് സർവ്വേയുടെ യഥാർത്ഥ ഫലം.
ഈ സർവേയുടെ ഫലങ്ങൾ അനുസരിച്ച്, പ്രതികരിച്ചവരിൽ 58 ശതമാനം പേരും ഇസ്രായേൽ ഗവൺമെൻ്റിൻ്റെ തലവൻ്റെ അടിയന്തര രാജിയെ അനുകൂലിച്ചു. 2022ലെ തെരഞ്ഞെടുപ്പിൽ അധികാരത്തിലേറിയ പാർട്ടികൾക്ക് വോട്ട് ചെയ്തവരിൽ 28 ശതമാനം പേർ നിലവിലെ പ്രധാനമന്ത്രിയുടെ രാജി എന്ന ആശയത്തെ പിന്തുണച്ചു. 54 ശതമാനം പേരും രാജ്യത്ത് പെട്ടെന്ന് തിരഞ്ഞെടുപ്പ് നടത്തേണ്ടത് ആവശ്യമാണെന്ന് കരുതുന്നു.
കൂടാതെ, പ്രതികരിച്ചവരിൽ 48 ശതമാനം പേർ പ്രതിരോധ മന്ത്രി യോവ് ഗാലൻ്റിൻ്റെ അടിയന്തര രാജി എന്ന ആശയത്തെയും പിന്തുണച്ചു, പ്രതികരിച്ചവരിൽ 50 ശതമാനം പേർ ഇസ്രായേൽ സൈന്യത്തിൻ്റെ ജനറൽ സ്റ്റാഫ് മേധാവിയെ പിരിച്ചുവിടുന്നതിനെ അനുകൂലിക്കുന്നുണ്ട്.
ഓൺലൈനായും ഫോണിലൂടെയും കഴിഞ്ഞ ചെവ്വാഴ്ച്ചയാണ് ചാനൽ 12 ടെലിവിഷൻ സർവ്വേ നടത്തിയത്.
