കൊച്ചി: എല്ലാ യു ഡി എഫ് എംഎൽഎമാരും ഒരു മാസത്തെ ശമ്പളം മുഖ്യമന്ത്രിയുടെ ദുരിതാശ്വാസനിധിയിലേക്ക് സംഭാവന നൽകുമെന്ന് പ്രതിപക്ഷ നേതാവ് വി.ഡി.സതീശൻ. വയനാട് ദുരന്തത്തിൽ ഇരകളായവരുടെ മുഴുവന്‍ പ്രശ്‌നങ്ങളും പരിഹരിക്കാനുള്ള പ്രവര്‍ത്തനങ്ങളില്‍ യുഡിഎഫും പങ്കാളിയാകുമെന്നും സതീശൻ പ്രതികരിച്ചു.
യു ഡി എഫ് എം എൽ എ മാരുടെ ശമ്പളം മുഖ്യമന്ത്രിയുടെ ദുരിതാശ്വാസനിധിയിലേക്ക് നൽകുന്നതിനെ ചൊല്ലി നേരത്ത കോൺഗ്രസിൽ ഭിന്നതയുണ്ടായിരുന്നു. ഇടതുപക്ഷത്തിന്‍റെ കൈയിൽ മാസ ശമ്പളം കൊടുക്കേണ്ട കാര്യമില്ലെന്ന് കെപിസിസി പ്രസിഡന്‍റ് കെ.സുധാകരൻ പറഞ്ഞിരുന്നു. മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നൽകുമെന്ന് രമേശ് ചെന്നിത്തല അറിയിച്ചിരുന്നു. അതിന് പിന്നാലെയായിരുന്നു സുധാകരന്‍റെ പ്രതികരണം.
എന്നാൽ സുധാകരനെയും തള്ളി സതീശൻ രംഗത്തെത്തി. മുഖ്യമന്ത്രിയുടെ ദുരിതാശ്വാസ നിധിയിലേക്ക് പണം നൽകണമെന്നും സർക്കാരിനെ വിമർശിക്കേണ്ട സമയം ഇതല്ലെന്നും സതീശൻ പറഞ്ഞു.
