തൃശൂര്: മുഖ്യമന്ത്രിയുടെ അറിവോടെയാണ് തൃശൂര് പൂരം കലക്കിയതെന്നും എഡിജിപി അജിത് കുമാറിന്റെ നേതൃത്വത്തിലാണ് മുഖ്യമന്ത്രി ബിജെപിയെ സഹായിച്ചതെന്നും അജിത് കുമാറിനെതിരെ മുഖ്യമന്ത്രി നടപടി എടുക്കാത്തതിന് ഇതാണ് കാരണമെന്നും കോണ്ഗ്രസ് നേതാവ് കെ മുരളീധരന് ആരോപിച്ചു. ഏപ്രില് 16 രാത്രിയാണ് പൂരം അലങ്കോലമാക്കിയത്. പിറ്റേ ദിവസം ഏപ്രില് 17ന് രാവിലെ തന്നെ ഇക്കാര്യം താന് മാധ്യമങ്ങളോട് പറഞ്ഞതാണ്.
പൂരം കലക്കിയതിന് പിന്നില് മുഖ്യമന്ത്രിയുടെ കൈകളുണ്ടെന്ന് താന് ഉറച്ച് വിശ്വസിക്കുകയാണ്. സുരേഷ് ഗോപി ജയിപ്പിക്കാനെടുത്ത നാടകമായിരുന്നു പൂരം കലക്കല്. സംഭവത്തില് ജുഡീഷ്യല് അന്വേഷണമാണ് വേണ്ടത്. ഇക്കാര്യം ചൂണ്ടിക്കാട്ടി മുഖ്യമന്ത്രിക്ക് കത്ത് നല്കുമെന്നും മുരളീധരന് പറഞ്ഞു. പല രഹസ്യങ്ങളും അജിത് കുമാറിന് അറിയാമെന്നത് കൊണ്ടാണ് മുഖ്യമന്ത്രി ഇപ്പോഴും സംരക്ഷിക്കുന്നത്.
