ഗാസ: ഫലസ്തീനിലെ അൽ-ഷിഫ ആശുപത്രിക്ക് സമീപം ഇസ്രായേൽ നടത്തിയ ആക്രമണത്തിൽ അഞ്ച് മാധ്യമപ്രവർത്തകർ കൊല്ലപ്പെട്ടു. അൽ ജസീറ ലേഖകരായ അനസ് അൽ-ഷെരീഫ്, മുഹമ്മദ് ഖ്രീഖ്, ക്യാമറാമാൻമാരായ ഇബ്രാഹിം സഹർ, മോമെൻ അലിവ, മുഹമ്മദ് നൗഫൽ എന്നിവരാണ് കൊല്ലപ്പെട്ടത്.
അൽ-ഷിഫ ആശുപത്രിയുടെ പ്രധാന ഗേറ്റിന് പുറത്തുള്ള പത്രപ്രവർത്തകർക്കുള്ള കൂടാരം ലക്ഷ്യമിട്ട് ഇസ്രായേൽ നടത്തിയ ആക്രമണത്തിൽ മൊത്തം ഏഴു പേരാണ് മരിച്ചത്
ആക്രമണത്തിന് തൊട്ടുപിന്നാലെ, കൊല്ലപ്പെട്ട ലേഖകൻ അനസ് അൽ-ഷെരീഫിനെ “ഭീകരൻ” എന്ന് മുദ്രകുത്തി നടത്തിയ പ്രസ്താവനയിൽ ഇസ്രായേൽ സൈന്യം ആക്രമണം സമ്മതിച്ചു. ഹമാസിലെ ഒരു തീവ്രവാദ സെല്ലിന്റെ തലവനായി അനസ് അൽ-ഷെരീഫ് സേവനമനുഷ്ഠിച്ചു എന്നാണ് ഇസ്രായിലിന്റെ വാദം.
ഗാസയിലെ യുദ്ധത്തിൽ മാധ്യമപ്രവർത്തകരെ ലക്ഷ്യം വച്ചുള്ള ആക്രമണത്തിൽ ഇതുവരെ 200 ഓളം മാധ്യമ പ്രവർത്തകർ കൊല്ലപ്പെട്ടതായി മാധ്യമ നിരീക്ഷകർ പറയുന്നു. വിശ്വസനീയമായ തെളിവുകൾ നൽകാതെ മാധ്യമപ്രവർത്തകരെ തീവ്രവാദികളായി മുദ്രകുത്തുന്ന ഇസ്രായേലിന്റെ രീതി മാധ്യമ സ്വാതന്ത്ര്യത്തോടുള്ള അവരുടെ ഉദ്ദേശ്യത്തെയും ബഹുമാനത്തെയും കുറിച്ച് ഗുരുതരമായ ചോദ്യങ്ങൾ ഉയർത്തുന്നു,കമ്മിറ്റി ടു പ്രൊട്ടക്റ്റ് ജേണലിസ്റ്റ്സ് റീജിയണൽ ഡയറക്ടർ സാറ ഖുദ പറഞ്ഞു. പത്രപ്രവർത്തകർ സാധാരണക്കാരാണ്, അവരെ ഒരിക്കലും ലക്ഷ്യം വയ്ക്കരുത്. ഈ കൊലപാതകങ്ങൾക്ക് ഉത്തരവാദികളായവർ സമാധനം പറയണമെന്നും അദ്ദേഹം കൂട്ടിച്ചേർത്തു. രക്തരൂക്ഷിതമായ കുറ്റകൃത്യം എന്നാണ് പലസ്തീൻ ജേണലിസ്റ്റ്സ് സിൻഡിക്കേറ്റ് ആക്രമണത്തെ വിശേഷിപ്പിച്ചത്.
ഇസ്രായേലും അൽ ജസീറയും വർഷങ്ങളായി തർക്കപരമായ ബന്ധത്തിലാണ്. ഇസ്രായേൽ അധികാരികൾ രാജ്യത്ത് ചാനൽ നിരോധിക്കുകയും ഗാസയിലെ ഏറ്റവും പുതിയ യുദ്ധത്തെത്തുടർന്ന് അതിന്റെ ഓഫീസുകൾ റെയ്ഡ് ചെയ്യുകയും ചെയ്തു. അൽ ജസീറയ്ക്ക് ഭാഗികമായി ധനസഹായം നൽകുന്ന ഖത്തർ, വർഷങ്ങളായി ഹമാസിന്റെ രാഷ്ട്രീയ നേതൃത്വത്തിനായി ഒരു ഓഫീസ് ആതിഥേയത്വം വഹിക്കുകയും ഇസ്രായേലും ഗ്രൂപ്പും തമ്മിലുള്ള പരോക്ഷ ചർച്ചകൾക്ക് പതിവായി വേദിയാകുകയും ചെയ്തു.
