ദമ്മാം: ഇന്ത്യൻ രൂപയുടെ മൂല്യം യു.എസ്. ഡോളറിനെതിരെ ചരിത്രത്തിലെ ഏറ്റവും താഴ്ന്ന നിലയിൽ എത്തിയതോടെ, ഇന്ത്യൻ പ്രവാസികൾ നാട്ടിലേക്ക് പണം അയക്കുന്നതിൽ വൻ വർദ്ധനവ് രേഖപ്പെടുത്തി. നവംബർ 21-ന് ഡോളറിനെതിരെ രൂപയുടെ വിനിമയ നിരക്ക് 89.48 എന്ന റെക്കോർഡ് താഴ്ന്ന നിലയിലെത്തിയിരുന്നു.
നാട്ടിലേക്ക് പണം അയക്കുമ്പോൾ ഈ വർഷത്തെ ഏറ്റവും ഉയർന്ന നിരക്കാണ് ഇപ്പോൾ ലഭിക്കുന്നത്. ഈ അനുകൂല സാഹചര്യം മുതലെടുത്ത് പ്രവാസികൾ സ്കൂൾ ഫീസ്, ഭവനവായ്പാ ഗഡുക്കൾ, മെഡിക്കൽ ബില്ലുകൾ തുടങ്ങിയ സാമ്പത്തിക ബാധ്യതകൾ തീർക്കാൻ കൂട്ടമായി പണം അയക്കുന്നുണ്ട്. യു.എസ്. താരിഫുകൾ, വിദേശ നിക്ഷേപം പിൻവലിക്കൽ, ആഗോള പണലഭ്യതയിലെ കുറവ് എന്നിവയാണ് രൂപയുടെ മൂല്യം ഇടിയാൻ പ്രധാന കാരണങ്ങളായി ചൂണ്ടിക്കാണിക്കുന്നത്.
