പട്ന: നിയമന കത്ത് കൈമാറുന്ന ചടങ്ങിനിടെ ഒരു യുവതിയുടെ നിഖാബ് വലിച്ചുനീക്കി ബീഹാർ മുഖ്യമന്ത്രി നിതീഷ് കുമാർ വിവാദത്തിൽ. പുതിയതായി നിയമനം ലഭിച്ച ആയുഷ് ഡോക്ടർമാരിൽ ഒരാളായ നുസ്രത്ത് പർവീണിന്റെ നിഖാബാണ് മുഖ്യമന്ത്രി വലിച്ചുനീക്കാൻ ശ്രമിച്ചത്. മുഖ്യമന്ത്രിയുടെ സെക്രട്ടേറിയറ്റിലെ ‘സംവാദ്’ ഹാളിൽ ആയിരത്തിലധികം ഡോക്ടർമാർക്ക് നിയമന കത്തുകൾ നൽകുന്ന ചടങ്ങിനിടെയായിരുന്നു ഈ അപ്രതീക്ഷിത സംഭവം.
നിഖാബ് ധരിച്ചെത്തിയ യുവതിയെ കണ്ട 75 വയസ്സുകാരനായ മുഖ്യമന്ത്രി “ഇത് എന്താണ്?” എന്ന് ചോദിച്ച ശേഷം കുനിഞ്ഞ് നിഖാബ് താഴേക്ക് വലിച്ചുനീക്കുകയായിരുന്നു. ഈ സമയം പരിഭ്രാന്തയായ യുവതിയെ ഒരു ഉദ്യോഗസ്ഥൻ ഉടൻ തന്നെ മാറ്റിനിർത്തി. മുഖ്യമന്ത്രിയുടെ അടുത്ത് നിന്നിരുന്ന ഉപമുഖ്യമന്ത്രി സാമ്രാട്ട് ചൗധരി അദ്ദേഹത്തെ നിയന്ത്രിക്കാൻ ശ്രമിക്കുന്നതും വീഡിയോയിൽ വ്യക്തമാണ്.
സംഭവത്തിന്റെ വീഡിയോ ക്ലിപ്പ് സോഷ്യൽ മീഡിയയിൽ അതിവേഗം വൈറലാവുകയും ആർ.ജെ.ഡി., കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ ഈ നടപടിയെ ശക്തമായി വിമർശിക്കുകയും ചെയ്തു. ഇത് നിതീഷ് കുമാറിന്റെ അസ്ഥിരമായ മാനസികാരോഗ്യത്തിന്റെ ഏറ്റവും പുതിയ തെളിവാണെന്നും, നീചമായ പ്രവൃത്തിയാണിതെന്നും പ്രതിപക്ഷം ആരോപിച്ചു.
