ദമ്മാം: കിങ് അബ്ദുൽ അസീസ് സെന്റർ ഫോർ വേൾഡ് കൾച്ചർ (ഇത്ര) സംഘടിപ്പിക്കുന്ന അഞ്ചാമത് വാർഷിക ‘ഐറീഡ്’ (iRead) വായനാ മാരത്തൺ ഫെബ്രുവരി 5 മുതൽ 7 വരെ നടക്കും. അറബ് ഫെഡറേഷൻ ഫോർ ലൈബ്രറീസ് ആൻഡ് ഇൻഫർമേഷൻ, വിവിധ പരിസ്ഥിതി പങ്കാളികൾ എന്നിവരുടെ സഹകരണത്തോടെയാണ് ഈ വിപുലമായ പരിപാടി സംഘടിപ്പിക്കുന്നത്. സൗദി അറേബ്യക്ക് പുറമെ യു.എ.ഇ, ഖത്തർ, ഒമാൻ, ഈജിപ്ത്, മൊറോക്കോ, ടുണീഷ്യ, അൾജീരിയ, പലസ്തീൻ, ജോർദാൻ, ബഹ്റൈൻ, കുവൈത്ത്, ഇറാഖ് എന്നീ 13 അറബ് രാജ്യങ്ങളിൽ നിന്നുള്ള 52 ലൈബ്രറികൾ ഈ വർഷത്തെ മാരത്തണിൽ ഭാഗമാകും. കഴിഞ്ഞ വർഷത്തെ അപേക്ഷിച്ച് പങ്കാളിത്തത്തിൽ 235 ശതമാനം വർദ്ധനവാണ് ഇത്തവണ രേഖപ്പെടുത്തിയിട്ടുള്ളത്.
സമൂഹത്തിന്റെ വിവിധ തുറകളിലുള്ളവർക്കിടയിൽ വായനാശീലം വളർത്തുന്നതിനായി ‘ഇത്ര’ നടപ്പിലാക്കുന്ന വിപുലമായ പദ്ധതികളുടെ ഭാഗമാണിതെന്ന് ഇത്ര ലൈബ്രറി മേധാവി അബ്ദുള്ള അൽ ഹവാസ് പറഞ്ഞു. വായനയ്ക്ക് വലിയ പ്രാധാന്യമാണ് കേന്ദ്രം നൽകുന്നതെന്നും അടുത്ത അഞ്ച് വർഷത്തേക്കുള്ള മുൻഗണനാ പട്ടികയിൽ ഇതിനെ ഉൾപ്പെടുത്തിയിട്ടുണ്ടെന്നും അദ്ദേഹം വ്യക്തമാക്കി. അറബ് രാജ്യങ്ങളിലെ വായനാ പ്രവണതകൾ നിരീക്ഷിക്കുന്നതിനായി ‘അറബ് റീഡിങ് ഇൻഡക്സ്’ എന്ന സംവിധാനത്തിനും കേന്ദ്രം തുടക്കം കുറിച്ചിട്ടുണ്ട്. അറിവിന്റെ അടിസ്ഥാന തൂണായ വായനയെ പ്രോത്സാഹിപ്പിക്കാൻ വ്യക്തികളും കുടുംബങ്ങളും ഈ മാരത്തണിൽ പങ്കുചേരണമെന്ന് ഇത്ര അധികൃതർ അഭ്യർത്ഥിച്ചു. വായനാ നൈപുണ്യം മെച്ചപ്പെടുത്താനും പുസ്തകങ്ങളുടെ ലോകം പര്യവേക്ഷണം ചെയ്യാനും ഈ പരിപാടി മികച്ച അവസരമൊരുക്കും.
