വാഷിംഗ്ടൺ: ചുവന്ന ഗ്രഹമായ ചൊവ്വയിലേക്ക് മനുഷ്യൻ ആദ്യമായി കാലുകുത്തുമ്പോൾ, ആ ചരിത്ര നിമിഷത്തിൽ ലോകം ഏറ്റവും കൂടുതൽ പ്രതീക്ഷയോടെ നോക്കുന്നത് അലിസ്സ കാർസൺ എന്ന യുവതിയെയാണ്. 2033-ൽ നാസ വിഭാവനം ചെയ്യുന്ന ചൊവ്വാ ദൗത്യത്തിന് തയ്യാറെടുക്കുന്ന ലോകത്തിലെ ഏറ്റവും പ്രായം കുറഞ്ഞ ബഹിരാകാശ ഗവേഷകരിൽ ഒരാളാണ് അലിസ്സ. കേവലം മൂന്ന് വയസ്സുള്ളപ്പോൾ ഒരു കാർട്ടൂൺ പരമ്പര കണ്ടതിലൂടെ തുടങ്ങിയ അലിസ്സയുടെ ചൊവ്വാ സ്വപ്നം ഇന്ന് ഒരു ലോകത്തിന്റെ മുഴുവൻ പ്രതീക്ഷയായി മാറിയിരിക്കുകയാണ്.
‘ബ്ലൂ ബെറി’ എന്ന വിളിപ്പേരിലറിയപ്പെടുന്ന അലിസ്സ, നാസയുടെ ഔദ്യോഗിക പരിശീലന പരിപാടികളിൽ പങ്കെടുക്കുന്നതിനൊപ്പം അഡ്വാൻസ്ഡ് പോസ്സം അക്കാദമിയിൽ നിന്ന് ബിരുദം നേടിയ ഏറ്റവും പ്രായം കുറഞ്ഞ വ്യക്തി എന്ന ബഹുമതിയും സ്വന്തമാക്കിയിട്ടുണ്ട്. നാസയുടെ ലോകമെമ്പാടുമുള്ള 14 വിസിറ്റർ സെന്ററുകളും സന്ദർശിച്ച ആദ്യ വ്യക്തി കൂടിയാണ് ഈ മിടുക്കി.
ഒരു ബഹിരാകാശ യാത്രികയ്ക്ക് ആവശ്യമായ അതീവ കഠിനമായ ശാരീരിക-മാനസിക പരിശീലനങ്ങളിലൂടെയാണ് അലിസ്സ ഇപ്പോൾ കടന്നുപോകുന്നത്. ഇതിന്റെ ഭാഗമായി ഭൂഗുരുത്വമില്ലാത്ത അവസ്ഥയിലുള്ള മൈക്രോ ഗ്രാവിറ്റി പരിശീലനവും അന്തരീക്ഷ മർദ്ദത്തിലെ വ്യത്യാസങ്ങൾ പഠിക്കാനുള്ള അണ്ടർവാട്ടർ ട്രെയിനിംഗും അവർ പൂർത്തിയാക്കി വരുന്നു.
അന്താരാഷ്ട്ര തലത്തിലുള്ള ദൗത്യമായതുകൊണ്ട് തന്നെ ആശയവിനിമയത്തിനായി ഇംഗ്ലീഷ് കൂടാതെ സ്പാനിഷ്, ഫ്രഞ്ച്, ചൈനീസ് ഭാഷകളിലും അലിസ്സ പ്രാവീണ്യം നേടിയിട്ടുണ്ട്. പലപ്പോഴും ഒരു ‘മടക്കയാത്ര ഇല്ലാത്ത ദൗത്യം’ എന്ന് വിശേഷിപ്പിക്കപ്പെടുന്ന ചൊവ്വാ യാത്രയ്ക്കായി സ്വന്തം ജീവിതം തന്നെ സമർപ്പിക്കാൻ താൻ തയ്യാറാണെന്ന് അലിസ്സ പലതവണ വ്യക്തമാക്കിയിട്ടുണ്ട്. തന്റെ വ്യക്തിപരമായ സന്തോഷങ്ങളേക്കാൾ ശാസ്ത്രലോകത്തിന്റെ മുന്നേറ്റത്തിന് മുൻഗണന നൽകുന്ന അലിസ്സ കാർസൺ ഇന്ന് ദശലക്ഷക്കണക്കിന് യുവാക്കൾക്ക്, പ്രത്യേകിച്ച് പെൺകുട്ടികൾക്ക് വലിയൊരു പ്രചോദനമാണ്.
