വാഷിംഗ്ടൺ: ഇറാന്റെ നാവിക കരുത്തിനെയും സൈനിക നേതൃത്വത്തെയും അമേരിക്കൻ സൈന്യം പൂർണ്ണമായും തകർത്തെന്ന് അവകാശവാദവുമായി അമേരിക്കൻ പ്രസിഡന്റ് ഡോണാൾഡ് ട്രംപ്. വൈറ്റ് ഹൗസിൽ നടത്തിയ പ്രത്യേക വാർത്താ സമ്മേളനത്തിലാണ് ട്രംപ് ഇക്കാര്യം വ്യക്തമാക്കിയത്. ഇറാന്റെ ആക്രമണങ്ങൾക്കും ഭീഷണികൾക്കും നൽകുന്ന ശക്തമായ മറുപടിയാണിതെന്നും, ഇതിലും കടുത്ത പ്രത്യാഘാതങ്ങൾ ഇറാൻ നേരിടേണ്ടി വരുമെന്നും അദ്ദേഹം മുന്നറിയിപ്പ് നൽകി. ഇറാന്റെ പ്രധാന സൈനിക താവളങ്ങൾക്കും നാവിക ആസ്തികൾക്കും മേൽ അമേരിക്ക നടത്തിയ വ്യോമാക്രമണങ്ങൾ വൻ വിജയമായിരുന്നുവെന്നാണ് ട്രംപിന്റെ വിലയിരുത്തൽ.
മേഖലയിൽ സമാധാനം പുലരണമെന്നാണ് താൻ ആഗ്രഹിക്കുന്നതെങ്കിലും അമേരിക്കയുടെയും സഖ്യകക്ഷികളുടെയും സുരക്ഷ അപകടത്തിലായാൽ നിശബ്ദരായിരിക്കില്ലെന്ന് ട്രംപ് ആവർത്തിച്ചു. ഇറാന്റെ ഉന്നത സൈനിക കമാൻഡർമാരെ വധിച്ചത് ശത്രുക്കളുടെ ആത്മവീര്യം തകർക്കാൻ ലക്ഷ്യമിട്ടുള്ളതാണെന്നും അദ്ദേഹം പറഞ്ഞു. “നമ്മൾ ഇതിലും മോശമായ കാര്യങ്ങൾ ചെയ്യാൻ പ്രാപ്തരാണ്, എന്നാൽ നിലവിൽ അതിന്റെ ആവശ്യമില്ലെന്ന് കരുതുന്നു. എങ്കിലും ഇറാൻ ജാഗ്രത പാലിക്കണം,” ട്രംപ് കൂട്ടിച്ചേർത്തു. നേരത്തെ ഇറാന്റെ മിസൈൽ ആക്രമണങ്ങൾക്ക് പിന്നാലെയാണ് അമേരിക്ക തിരിച്ചടി ശക്തമാക്കിയത്.
അതേസമയം, ട്രംപിന്റെ പ്രസ്താവനയ്ക്കെതിരെ ഇറാൻ ശക്തമായി രംഗത്തെത്തിയിട്ടുണ്ട്. അമേരിക്കൻ ആക്രമണങ്ങളെ പ്രതിരോധിക്കുമെന്നും തങ്ങളുടെ സൈനിക ശേഷി ഒട്ടും കുറഞ്ഞിട്ടില്ലെന്നും ഇറാൻ വിദേശകാര്യ മന്ത്രാലയം പ്രതികരിച്ചു. മിഡിൽ ഈസ്റ്റിലെ സംഘർഷം ആഗോള സാമ്പത്തിക മേഖലയെയും എണ്ണ വിപണിയെയും ബാധിക്കുമെന്ന ആശങ്കയും ഈ സാഹചര്യത്തിൽ നിലനിൽക്കുന്നുണ്ട്. അന്താരാഷ്ട്ര തലത്തിൽ ഐക്യരാഷ്ട്രസഭ ഉൾപ്പെടെയുള്ള സംഘടനകൾ ഇരു രാജ്യങ്ങളും സംയമനം പാലിക്കണമെന്ന് അഭ്യർത്ഥിച്ചെങ്കിലും പ്രകോപനപരമായ പ്രസ്താവനകൾ തുടരുന്നത് യുദ്ധഭീതി വർധിപ്പിക്കുകയാണ്.
