അലഹാബാദ്: സ്വന്തം വീട്ടിൽ പ്രാർത്ഥന (നിസ്കാരം) നടത്തുന്നതിന് തടസ്സം നേരിട്ട വ്യക്തിക്ക് 24 മണിക്കൂറും സായുധ പോലീസ് സുരക്ഷ ഉറപ്പാക്കാൻ അലഹബാദ് ഹൈക്കോടതി ഉത്തരവിട്ടു. ഉത്തർപ്രദേശിലെ ഒരു ഗ്രാമത്തിൽ വീടിനുള്ളിൽ നിസ്കരിക്കുന്നത് അയൽവാസികൾ തടസ്സപ്പെടുത്തിയെന്ന പരാതി പരിഗണിച്ചുകൊണ്ടാണ് കോടതിയുടെ ഈ സുപ്രധാന ഇടപെടൽ. വീടിനുള്ളിലെ സ്വകാര്യതയിൽ പ്രാർത്ഥന നടത്തുന്നത് ഒരു വ്യക്തിയുടെ മൗലികാവകാശമാണെന്നും അതിൽ ഇടപെടാൻ മറ്റാർക്കും അവകാശമില്ലെന്നും കോടതി വ്യക്തമാക്കി.
പരാതിക്കാരന്റെ ജീവനും സ്വത്തിനും ഭീഷണിയുണ്ടെന്ന് വിലയിരുത്തിയ കോടതി, അദ്ദേഹത്തിന് ഉടനടി സായുധ സുരക്ഷ നൽകാൻ പോലീസിന് നിർദ്ദേശം നൽകി. മതപരമായ ചടങ്ങുകൾ സ്വന്തം വസതിയിൽ നിർവ്വഹിക്കുന്നതിന് ആരും തടസ്സം നിൽക്കരുതെന്നും ഇത്തരം വിവേചനങ്ങൾ അനുവദിക്കാനാവില്ലെന്നും കോടതി നിരീക്ഷിച്ചു. വരും ദിവസങ്ങളിൽ ഈ ഉത്തരവ് നടപ്പിലാക്കുന്നുണ്ടെന്ന് ഉറപ്പുവരുത്താൻ ജില്ലാ ഭരണകൂടത്തിന് കോടതി കർശന നിർദ്ദേശം നൽകിയിട്ടുണ്ട്.
