മലപ്പുറം: പാണക്കാട് സയ്യിദ് സാദിഖലി ശിഹാബ് തങ്ങൾക്കെതിരെ സോഷ്യൽ മീഡിയ വഴി ഉന്നയിക്കപ്പെട്ട വ്യാജ ലൈംഗിക ആരോപണത്തിൽ ശക്തമായ പ്രതിഷേധവുമായി രാഹുൽ മാങ്കൂട്ടത്തിലും ഹിന്ദു പാർലമെന്റ് നേതാവ് രാഹുൽ ഈശ്വറും രംഗത്തെത്തി. രാഷ്ട്രീയമായ വിയോജിപ്പുകളെ വ്യക്തിഹത്യയിലേക്ക് എത്തിക്കുന്നത് അങ്ങേയറ്റം നീചമായ നടപടിയാണെന്ന് ഇരുവരും പ്രതികരിച്ചു. സമൂഹത്തിൽ വലിയ ആദരവ് ലഭിക്കുന്ന വ്യക്തിത്വങ്ങളെ ഇത്തരം വ്യാജ പ്രചാരണങ്ങളിലൂടെ തേജോവധം ചെയ്യാൻ ശ്രമിക്കുന്നത് കേരളത്തിന്റെ രാഷ്ട്രീയ സംസ്കാരത്തിന് ചേർന്നതല്ലെന്ന് രാഹുൽ മാങ്കൂട്ടത്തിൽ പറഞ്ഞു. കുറ്റവാളികളെ ഉടൻ നിയമത്തിന് മുന്നിൽ കൊണ്ടുവരണമെന്നും അദ്ദേഹം ആവശ്യപ്പെട്ടു.
സാദിഖലി തങ്ങൾക്കെതിരായ ഇത്തരം സൈബർ ആക്രമണങ്ങൾ ലജ്ജാകരമാണെന്ന് രാഹുൽ ഈശ്വർ വ്യക്തമാക്കി. രാഷ്ട്രീയ പോരാട്ടങ്ങൾ അന്തസ്സുള്ള രീതിയിലായിരിക്കണമെന്നും, വ്യക്തിപരമായ ഇത്തരം അധിക്ഷേപങ്ങൾ ജനാധിപത്യ മൂല്യങ്ങളെ തകർക്കുമെന്നും അദ്ദേഹം ചൂണ്ടിക്കാട്ടി. മതസൗഹാർദ്ദത്തിനും സാമൂഹിക ഐക്യത്തിനും വേണ്ടി നിലകൊള്ളുന്ന പാണക്കാട് കുടുംബത്തിലെ അംഗത്തിനെതിരെ ആസൂത്രിതമായ നീക്കങ്ങളാണ് നടക്കുന്നതെന്നും ഇതിനെതിരെ ശക്തമായ അന്വേഷണം വേണമെന്നും അദ്ദേഹം കൂട്ടിച്ചേർത്തു. വിവിധ രാഷ്ട്രീയ-സാമൂഹിക മേഖലകളിൽ നിന്നുള്ളവർ ഈ സംഭവത്തിൽ തങ്ങൾക്കെതിരെ നടന്ന നീചമായ സൈബർ ആക്രമണത്തെ അപലപിച്ച് രംഗത്തെത്തിയിട്ടുണ്ട്.
