വാഷിംഗ്ടൺ/ടെഹ്റാൻ: സമാധാന ചർച്ചകൾ പുരോഗമിക്കുന്നതിനിടയിലും ഇറാന്റെ എണ്ണസമ്പത്ത് കൈക്കലാക്കുകയാണ് തന്റെ ലക്ഷ്യമെന്ന് വ്യക്തമാക്കി അമേരിക്കൻ പ്രസിഡന്റ് ഡൊണാൾഡ് ട്രംപ്. ഫിനാൻഷ്യൽ ടൈംസിന് നൽകിയ അഭിമുഖത്തിലാണ്, ഇറാന്റെ പ്രധാന എണ്ണ കയറ്റുമതി കേന്ദ്രമായ ഖാർഗ് ദ്വീപ് പിടിച്ചെടുക്കുന്നത് തന്റെ പ്രിയപ്പെട്ട ഓപ്ഷനാണെന്ന് ട്രംപ് വെളിപ്പെടുത്തിയത്. വെനിസ്വേലയിലെ എണ്ണ ശേഖരത്തിന് മേൽ നിയന്ത്രണം ഏർപ്പെടുത്തിയതിന് സമാനമായ നീക്കമാണ് ഇറാനിലും ലക്ഷ്യമിടുന്നത്. ഖാർഗ് ദ്വീപ് പിടിച്ചെടുക്കുന്നത് എളുപ്പമാണെന്നും എന്നാൽ അവിടെ ദീർഘകാലം സൈന്യത്തെ നിലനിർത്തേണ്ടി വരുമെന്നും ട്രംപ് കൂട്ടിച്ചേർത്തു. ഇറാന്റെ വരുമാന സ്രോതസ്സ് പൂർണ്ണമായും ഇല്ലാതാക്കി അവരെ ചർച്ചാ മേശയിലേക്ക് എത്തിക്കാനാണ് വാഷിംഗ്ടൺ ഇതിലൂടെ ലക്ഷ്യമിടുന്നത്.
അതേസമയം, സമാധാന ചർച്ചകളുടെ മറവിൽ അമേരിക്ക ഇറാനിൽ കരസേനാ നീക്കത്തിന് രഹസ്യമായി പദ്ധതിയിടുകയാണെന്ന് ഇറാൻ പാർലമെന്റ് സ്പീക്കർ മുഹമ്മദ് ബാഗർ ഖാലിബാഫ് ആരോപിച്ചു. അമേരിക്കൻ സൈനികർ ഇറാൻ മണ്ണിൽ കാലുകുത്തിയാൽ അവരെ ‘തീ കൊളുത്തി’ ശിക്ഷിക്കുമെന്നും ഇറാൻ സൈന്യം അതിനായി കാത്തിരിക്കുകയാണെന്നും അദ്ദേഹം മുന്നറിയിപ്പ് നൽകി. കഴിഞ്ഞ ദിവസം മൂവായിരത്തിലധികം സൈനികരുമായി അമേരിക്കൻ യുദ്ധക്കപ്പൽ മേഖലയിൽ എത്തിയതും പതിനായിരത്തോളം പുതിയ സൈനികരെ വിന്യസിക്കാനുള്ള പെന്റഗണിന്റെ തീരുമാനവുമാണ് ഇറാന്റെ ഈ ആരോപണത്തിന് പിന്നിൽ. പുറമെ നയതന്ത്രത്തിന്റെ ഭാഷ സംസാരിക്കുമ്പോഴും അമേരിക്ക അധിനിവേശത്തിനാണ് ശ്രമിക്കുന്നതെന്ന് ഇറാൻ വാർത്താ ഏജൻസിയായ ഇർന റിപ്പോർട്ട് ചെയ്തു.
യുദ്ധം അഞ്ചാം വാരത്തിലേക്ക് കടക്കുമ്പോൾ അന്താരാഷ്ട്ര വിപണിയിൽ എണ്ണവില ബാരലിന് 116 ഡോളറിന് മുകളിലെത്തിയിരിക്കുകയാണ്. ഇറാന്റെ ഉപരോധം മൂലം ഹോർമുസ് കടലിടുക്ക് ഭാഗികമായി അടഞ്ഞുകിടക്കുന്നതാണ് ഈ വിലക്കയറ്റത്തിന് കാരണം. എന്നാൽ പാകിസ്ഥാൻ വഴി നടക്കുന്ന ചർച്ചകളിൽ പുരോഗതിയുണ്ടെന്നും 20 ഓളം എണ്ണക്കപ്പലുകൾ കടത്തിവിടാൻ ഇറാൻ സമ്മതിച്ചിട്ടുണ്ടെന്നും ട്രംപ് അവകാശപ്പെട്ടു. സമാധാന കരാറിലെത്താൻ വൈകിയാൽ ഇറാന്റെ ഊർജ്ജ നിലയങ്ങൾ തകർക്കുമെന്ന ഭീഷണി ട്രംപ് ഇപ്പോഴും നിലനിർത്തുന്നുണ്ട്. നയതന്ത്ര നീക്കങ്ങളും സൈനിക തയ്യാറെടുപ്പുകളും ഒരേസമയം നടക്കുന്നതോടെ പശ്ചിമേഷ്യയിലെ സാഹചര്യം അത്യന്തം സങ്കീർണ്ണമായി തുടരുകയാണ്.
