റിയാദ്: സൗദിയിലെ സംഗീതപ്രേമികൾ ആവേശത്തോടെ കാത്തിരിക്കുന്ന സൗണ്ട് സ്റ്റോം ഫെസ്റ്റിവലിന്റെ തീയതികൾ പ്രഖ്യാപിച്ചു. ഡിസംബർ 12 മുതൽ 14 വരെ റിയാദിലെ ബൻബാൻ ഏരിയയിലാണ് പരിപാടികൾ. ഫെസ്റ്റിവലിന്റെ അഞ്ചാമത് പതിപ്പാണിത്.
പ്രശസ്ത ഗായകനും റാപ്പറുമായ എമിനെമിന്റെ നേതൃത്വത്തിൽ നിരവധി പ്രാദേശിക, അന്തർദേശീയ താരങ്ങളുടെ പങ്കാളിത്തത്തോടെയാണ് ഇത്തവണത്തെ പതിപ്പെത്തുന്നത്. അമേരിക്കൻ റോക്ക് ബാൻഡായ തേർട്ടി സെക്കൻഡ്സ് ടു മാർസ്, ബ്രിട്ടീഷ് റോക്ക് ബാൻഡ് ‘മ്യൂസ്’, ജർമൻ ഡി.ജെ ബോറിസ് ബ്രെസിയ, ബ്രിട്ടീഷ്-കനേഡിയൻ ഡി.ജെ റിച്ചി ഹാട്ടൺ, ഇറ്റാലിയൻ ഡി.ജെ മാർക്കോ കൊറോള, സ്വിസ് അഡ്രിയാറ്റിക് ഡി.ജെ ജോഡിയായ അഡ്രിയാൻ ഷാല, അഡ്രിയാൻ ഷ്വൈറ്റ്സർ എന്നിവരും പരിപാടികളവതരിപ്പിക്കും.
മേഖലയിലെ ഏറ്റവും വലിയ സംഗീതോത്സവമായി സൗണ്ട് സ്റ്റോം തുടരുന്നുവെന്ന് എം.ഡി.എൽ ബെസ്റ്റിന്റെ സി.ഇ.ഒ റമദാൻ അൽ ഹർതാനി പറഞ്ഞു. കലാപരവും സംഗീതപരവുമായ വിനോദരംഗത്തെ നിലവിലെ വികസനം മെച്ചപ്പെടുത്തുന്നതിലും സംഗീത സർഗാത്മകതയുടെ കേന്ദ്രമെന്ന നിലയിൽ സൗദിയുടെ സ്ഥാനം ഉറപ്പിക്കുന്നതിലും അതിന്റെ പങ്ക് വലുതാണെന്നും അദ്ദേഹം കൂട്ടിച്ചേർത്തു.
