ഷാർജ: ‘നിങ്ങൾക്കും ഒരു പുസ്തകത്തിനുമിടയിൽ’ എന്ന പ്രമേയത്തിൽ ഷാർജ ബുക്ക് അതോറിറ്റി (എസ്.ബി.എ.) ഷാർജ എക്സ്പോ സെൻ്ററിൽ സംഘടിപ്പിക്കുന്ന 12 ദിവസത്തെ രാജ്യാന്തര പുസ്തകമേളയ്ക്ക് തുടക്കമായി. 1,224 അറബ് പ്രസാധകരും 1,126 അന്താരാഷ്ട്ര പ്രസാധകരും ഉൾപ്പെടെ 2,350-ലധികം പബ്ലിഷർമാർ മേളയിൽ പങ്കെടുക്കുന്നുണ്ട്.
ഈ വർഷത്തെ വിശിഷ്ടാതിഥിയായി ഗ്രീസിനെ സ്വാഗതം ചെയ്തുകൊണ്ട്, 58 ഗ്രീക്ക് പ്രസാധകരും സാംസ്കാരിക സ്ഥാപനങ്ങളും 600-ൽ അധികം കൃതികൾ പ്രദർശിപ്പിക്കുന്നു. കൂടാതെ, 44-ാമത് പതിപ്പിലെ സാംസ്കാരിക വ്യക്തിത്വമായി ഈജിപ്ഷ്യൻ എഴുത്തുകാരനും നാടകകൃത്തുമായ മുഹമ്മദ് സൽമാവിയെ ആദരിച്ചു.
നവംബർ 14-ന് നടക്കുന്ന സെഷനിൽ അന്താരാഷ്ട്ര താരം വിൽ സ്മിത്ത് അതിഥിയാകും. 1,200-ൽ അധികം പരിപാടികൾ മേളയിൽ അവതരിപ്പിക്കും. നവംബർ 16 വരെയാണ് പുസ്തകമേള നീണ്ടുനിൽക്കുക.
