കോട്ടയം: കേരള കോൺഗ്രസ് (എം) ഇടതുമുന്നണി വിടുമെന്ന തരത്തിൽ പ്രചരിക്കുന്ന വാർത്തകൾക്ക് വിരാമമിട്ട് പാർട്ടി ചെയർമാൻ ജോസ് കെ മാണി. തങ്ങൾ എൽ.ഡി.എഫിൽ തന്നെ ഉറച്ചുനിൽക്കുമെന്നും മുന്നണി മാറ്റത്തെക്കുറിച്ച് ചിന്തിക്കുന്നില്ലെന്നും അദ്ദേഹം കോട്ടയത്ത് മാധ്യമപ്രവർത്തകരോട് വ്യക്തമാക്കി. “പാർട്ടിയുടെ നിലപാടിനെക്കുറിച്ച് ആർക്കും ആശങ്ക വേണ്ട, ഞങ്ങളെ ഓർത്ത് ആരും കരയേണ്ടതില്ല” എന്നായിരുന്നു അഭ്യൂഹങ്ങളോടുള്ള അദ്ദേഹത്തിന്റെ പ്രതികരണം.
കഴിഞ്ഞ കുറച്ചു ദിവസങ്ങളായി കേരള കോൺഗ്രസ് (എം) യു.ഡി.എഫിലേക്ക് മടങ്ങാൻ നീക്കം നടത്തുന്നുവെന്ന തരത്തിൽ രാഷ്ട്രീയ കേന്ദ്രങ്ങളിൽ വലിയ ചർച്ചകൾ നടന്നിരുന്നു. ഇതിനെത്തുടർന്ന് പാർട്ടി പ്രവർത്തകർക്കിടയിലും മുന്നണിക്കുള്ളിലും ഉണ്ടായ ആശയക്കുഴപ്പം പരിഹരിക്കാനാണ് ജോസ് കെ മാണി നേരിട്ട് രംഗത്തെത്തിയത്. നിലവിൽ ഇടതുമുന്നണിയിൽ പാർട്ടിക്ക് അർഹമായ പരിഗണന ലഭിക്കുന്നുണ്ടെന്നും മുന്നണി ഐക്യത്തോടെ മുന്നോട്ട് പോകുമെന്നും അദ്ദേഹം കൂട്ടിചേർത്തു. ഇതോടെ പാർട്ടിയുടെ രാഷ്ട്രീയ നിലപാട് സംബന്ധിച്ച അനിശ്ചിതത്വത്തിന് താൽക്കാലികമായി തിരശ്ശീല വീണിരിക്കുകയാണ്.
