തൃശൂർ: മാള അണ്ണല്ലൂരിൽ നിയന്ത്രണം വിട്ട ബൈക്ക് റോഡരികിലെ മരത്തിലിടിച്ച് രണ്ട് യുവാക്കൾ മരിച്ചു. ചാലക്കുടി കൂർക്കമറ്റം സ്വദേശികളായ പടിഞ്ഞാക്കര വീട്ടിൽ നീൽ ഷാജു (19), അലൻ ഷാജു (19) എന്നിവരാണ് മരിച്ചത്. വ്യാഴാഴ്ച രാത്രി 11.30-ഓടെയായിരുന്നു നാടിനെ നടുക്കിയ ഈ അപകടം നടന്നത്. ബന്ധുക്കൾ കൂടിയായ ഇരുവരും സഞ്ചരിച്ചിരുന്ന ബൈക്ക് അണ്ണല്ലൂരിൽ വെച്ച് നിയന്ത്രണം തെറ്റി മരത്തിലേക്ക് ഇടിച്ചു കയറുകയായിരുന്നു.
അപകടം നടന്ന ഉടനെ ഗുരുതരമായി പരിക്കേറ്റ യുവാക്കളെ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. നീൽ ഷാജു ബംഗളൂരുവിൽ ഹോട്ടൽ മാനേജ്മെന്റ് വിദ്യാർഥിയും അലൻ ഷാജു പുല്ലൂറ്റ് ഐ.ടി.സി വിദ്യാർഥിയുമാണ്. രാത്രി വൈകി നടന്ന അപകടമായതിനാൽ രക്ഷാപ്രവർത്തനം തുടങ്ങാൻ അല്പം വൈകിയതും പരിക്കുകളുടെ തീവ്രതയും മരണകാരണമായി. യുവാക്കളുടെ അപ്രതീക്ഷിത വിയോഗത്തിൽ ചാലക്കുടി കൂർക്കമറ്റം പ്രദേശം വലിയ ദുഃഖത്തിലാണ്. പോലീസ് സ്ഥലത്തെത്തി മേൽനടപടികൾ സ്വീകരിച്ചു.
