ബെർലിൻ: ഗസ്സയിൽ ഇസ്രായേൽ വംശഹത്യ നടത്തുന്നുവെന്നാരോപിച്ച് ദക്ഷിണാഫ്രിക്ക അന്താരാഷ്ട്ര നീതിന്യായ കോടതിയിൽ ഫയൽ ചെയ്ത കേസിൽ ഇസ്രായേലിനെ പിന്തുണയ്ക്കാനുള്ള മുൻ തീരുമാനം ജർമ്മനി പിൻവലിച്ചു. ഇസ്രായേലിന് അനുകൂലമായി കോടതിയിൽ ഇടപെടൽ നടത്താൻ ഇനി ഉദ്ദേശിക്കുന്നില്ലെന്ന് ജർമ്മൻ വിദേശകാര്യ മന്ത്രാലയ വക്താവ് ജോസഫ് ഹിന്റർസെഹർ വാർത്താ സമ്മേളനത്തിൽ വ്യക്തമാക്കി. ഇസ്രായേലിന്റെ സൈനിക നടപടികളെ ന്യായീകരിക്കുന്നതിൽ നിന്ന് ജർമ്മനി പിന്നോട്ട് പോകുന്നത് നയതന്ത്രതലത്തിൽ വലിയ ചർച്ചകൾക്ക് വഴിവെച്ചിട്ടുണ്ട്.
ഇസ്രായേലിന് ആയുധങ്ങളും പിന്തുണയും നൽകുന്നതിലൂടെ ജർമ്മനിയും വംശഹത്യയിൽ പങ്കാളികളാകുന്നു എന്ന് ആരോപിച്ച് നിക്വരാഗ്വ ജർമ്മനിക്കെതിരെ മറ്റൊരു കേസ് അന്താരാഷ്ട്ര കോടതിയിൽ ഫയൽ ചെയ്തിട്ടുണ്ട്. ഈ സാഹചര്യത്തിലാണ് ഇസ്രായേലിനെ സഹായിക്കുന്നതിൽ നിന്ന് പിന്മാറാൻ ബെർലിൻ തീരുമാനിച്ചത്. നിക്വരാഗ്വ ഉയർത്തിയ നിയമപരമായ വെല്ലുവിളികൾ നേരിടുന്നതിലാണ് നിലവിൽ രാജ്യം ശ്രദ്ധ കേന്ദ്രീകരിക്കുന്നതെന്ന് വിദേശകാര്യ മന്ത്രാലയം അറിയിച്ചു. വംശഹത്യ ആരോപണങ്ങളിൽ ഇസ്രായേലിനെ പ്രതിരോധിക്കുന്നത് സ്വന്തം രാജ്യത്തിനെതിരെയുള്ള കേസിനെ ബാധിച്ചേക്കാമെന്ന വിലയിരുത്തലാണ് ജർമ്മനിയുടെ ഈ പെട്ടെന്നുള്ള മാറ്റത്തിന് പിന്നിലെന്ന് രാഷ്ട്രീയ നിരീക്ഷകർ കരുതുന്നു.
