വാഷിംഗ്ടൺ: ഇറാനെതിരെയുള്ള യുദ്ധത്തിൽ അമേരിക്കൻ പ്രസിഡന്റ് ഡൊണാൾഡ് ട്രംപിന് നിയന്ത്രണം നഷ്ടപ്പെട്ടതായും അദ്ദേഹം പരിഭ്രാന്തിയിലാണെന്നും യുഎസ് ഡെമോക്രാറ്റിക് സെനറ്റർ ക്രിസ് മർഫി ആരോപിച്ചു. സെനറ്റ് ഫോറിൻ റിലേഷൻസ് കമ്മിറ്റിയിലെ പ്രമുഖ അംഗമായ മർഫി, ഇറാനിൽ നാലാം വാരത്തിലേക്ക് കടക്കുന്ന അമേരിക്ക-ഇസ്രായേൽ സംയുക്ത സൈനിക നീക്കത്തെ രൂക്ഷമായ ഭാഷയിലാണ് വിമർശിച്ചത്. ഹോർമുസ് കടലിടുക്ക് തുറക്കാൻ ഇറാൻ തയ്യാറായില്ലെങ്കിൽ അവിടുത്തെ വൈദ്യുതി നിലയങ്ങൾ തകർക്കുമെന്ന് ട്രംപ് കഴിഞ്ഞ ദിവസം ഭീഷണിപ്പെടുത്തിയിരുന്നു. ഇതിന് പിന്നാലെയാണ് ട്രംപിന്റെ യുദ്ധതന്ത്രങ്ങൾ പാളിയെന്ന വിമർശനവുമായി സെനറ്റർ രംഗത്തെത്തിയത്.
ഇറാനുമായുള്ള ഈ പോരാട്ടം “ട്രംപിന്റെ ഭ്രാന്തൻ യുദ്ധം” ആണെന്നാണ് മർഫി വിശേഷിപ്പിച്ചത്. യുദ്ധം ആരംഭിച്ചതിന് ശേഷം അന്താരാഷ്ട്ര വിപണിയിൽ ഇന്ധനവില കുതിച്ചുയർന്നത് അമേരിക്കൻ സമ്പദ്വ്യവസ്ഥയെ വലിയ പ്രതിസന്ധിയിലേക്കാണ് നയിക്കുന്നത്. നിലവിലെ സാഹചര്യം അമേരിക്കയുടെ സാമ്പത്തിക അടിത്തറയെ തന്നെ തകർക്കാൻ തുടങ്ങിയിരിക്കുന്നു. കൃത്യമായ പദ്ധതിയോ ലക്ഷ്യമോ ഇല്ലാതെയാണ് ട്രംപ് ഭരണകൂടം മുന്നോട്ട് പോകുന്നതെന്നും ഇത് മേഖലയിൽ കൂടുതൽ അരാജകത്വം സൃഷ്ടിക്കുമെന്നും അദ്ദേഹം മുന്നറിയിപ്പ് നൽകി. കോൺഗ്രസിന്റെ അനുമതിയില്ലാതെ ഏകപക്ഷീയമായാണ് ട്രംപ് ഈ യുദ്ധത്തിലേക്ക് രാജ്യത്തെ തള്ളിവിട്ടതെന്നും മർഫി കൂട്ടിച്ചേർത്തു.
ഫെബ്രുവരി 28-ന് ആരംഭിച്ച യുദ്ധം ഒരു മാസം പൂർത്തിയാകാറാകുമ്പോഴും ഹോർമുസ് കടലിടുക്ക് വഴിയുള്ള എണ്ണനീക്കം പുനഃസ്ഥാപിക്കാൻ അമേരിക്കയ്ക്ക് സാധിച്ചിട്ടില്ല. ഇന്ധനവില വർദ്ധനവ് സാധാരണക്കാരായ അമേരിക്കക്കാരുടെ ജീവിതച്ചെലവ് വർദ്ധിപ്പിച്ചതായും ഇത് ട്രംപിനെ രാഷ്ട്രീയമായി സമ്മർദ്ദത്തിലാക്കുന്നുണ്ടെന്നും റിപ്പോർട്ടുകൾ സൂചിപ്പിക്കുന്നു. യുദ്ധം അവസാനിപ്പിക്കാൻ നയതന്ത്രപരമായ നീക്കങ്ങൾ നടത്തുന്നതിന് പകരം കൂടുതൽ പ്രകോപനപരമായ നിലപാടുകളാണ് വൈറ്റ് ഹൗസ് സ്വീകരിക്കുന്നത് എന്നാണ് ഡെമോക്രാറ്റുകളുടെ പ്രധാന ആരോപണം.
