വയനാട്: വയനാട് ചൂരൽ മല മുണ്ടക്കൈ ഉരുൾപ്പൊട്ടലുമായി ബന്ധപ്പെട്ട് മുഖ്യമന്ത്രിയുടെ അധ്യക്ഷതയിൽ വയനാട്ടിൽ ഇന്ന് സർവകക്ഷി യോഗം ചേരും. രാവിലെ 11.30 ന് വയനാട് കളക്ടറേറ്റിലെ എ പി ജെ ഹാളിൽ ആയിരിക്കും യോഗം ചേരുക.
സർവ്വകക്ഷി യോഗത്തിൽ വയനാടിൽ ക്യാമ്പ് ചെയ്യുന്ന മന്ത്രിമാർ, ജില്ലയിലെ എം എൽ എമാർ, ജില്ലാ പഞ്ചായത്ത്‌ പ്രസിഡന്‍റ്, രാഷ്ട്രീയ പാർട്ടി നേതാക്കൾ തുടങ്ങിയവർ പങ്കെടുക്കും. രാവിലെ 10.30 ന് എ പി ജെ ഹാളിൽ ഉദ്യോഗസ്ഥരുടെ യോഗവും മുഖ്യമന്ത്രിയുടെ അധ്യക്ഷതയിൽ നടക്കും.
അനൗദ്യോഗിക കണക്കുകള്‍ പ്രകാരം 200 ഓളം ആളുകളെ ഇനിയും കണ്ടെത്താനുണ്ട്. ഔദ്യോഗികമായി ഇതുവരെ സ്ഥിരീകരിച്ചത് 158 മരണങ്ങളാണ്. എന്നാൽ മരണ സംഖ്യ 252 ആയതായും റിപ്പോർട്ടുണ്ട്‌.
കനത്ത മഴ മൂലം മേഖലയിലെ ഇന്നലത്തെ രക്ഷാപ്രവര്‍ത്തനം തടസപ്പെട്ടിരുന്നു. അപായ സാധ്യത മുന്നിൽ കണ്ട് രക്ഷാപ്രവർത്തനം ഇന്നലെ നിർത്തി വെക്കുകയായിരുന്നു. മലവെള്ളപ്പാച്ചിലിന് സാധ്യതയുള്ളതിനാൽ രക്ഷാപ്രവർത്തകരെ സംഭവ സ്ഥലത്തുനിന്നും ഇന്നലെ മാറ്റിയിരുന്നു. ജീവനുള്ള എല്ലാവരെയും രകക്ഷപ്പെടുത്തിയതായി ഡി ജി പി ഇന്നലെ വ്യക്തമാക്കിയിരുന്നു
