വാഷിംഗ്ടൺ: ഇറാനുമായുള്ള സൈനിക നീക്കം പത്ത് ദിവസം കൂടി ഇതേ തീവ്രതയില് തുടര്ന്നാല് അമേരിക്കയുടെ ആയുധശേഖരം വലിയ പ്രതിസന്ധിയിലാകുമെന്ന് പെന്റഗണ് മുന്നറിയിപ്പ് നല്കി. നിലവിലെ യുദ്ധസാഹചര്യങ്ങള് വിലയിരുത്തിക്കൊണ്ട് അമേരിക്കന് പ്രസിഡന്റ് ഡൊണാള്ഡ് ട്രംപിനാണ് പ്രതിരോധ വകുപ്പ് ഈ ഗൗരവകരമായ വിവരം കൈമാറിയത്. കഴിഞ്ഞ കുറച്ചു ദിവസങ്ങളായി തുടരുന്ന അതിശക്തമായ വ്യോമാക്രമണങ്ങളും മിസൈൽ പ്രതിരോധ പ്രവർത്തനങ്ങളും കാരണം നിർണ്ണായകമായ പല ആയുധങ്ങളുടെയും സ്റ്റോക്ക് വേഗത്തിൽ കുറയുകയാണെന്ന് റിപ്പോർട്ടുകൾ വ്യക്തമാക്കുന്നു.
ശത്രു മിസൈലുകളെ ആകാശത്തുവെച്ച് തന്നെ തകർക്കാൻ ഉപയോഗിക്കുന്ന ‘താഡ്’ (THAAD), ‘എസ്.എം-3’ തുടങ്ങിയ അത്യാധുനിക പ്രതിരോധ മിസൈലുകളുടെ ലഭ്യതയിലാണ് വലിയ കുറവ് രേഖപ്പെടുത്തിയിരിക്കുന്നത്. കഴിഞ്ഞ ഒരു വർഷത്തിനിടെ ഉക്രെയ്നും ഇസ്രായേലിനും വൻതോതിൽ ആയുധങ്ങൾ നൽകിയത് അമേരിക്കയുടെ കരുതൽ ശേഖരത്തെ ബാധിച്ചിരുന്നു. ഇതിന് പിന്നാലെ ഇറാനുമായി നേരിട്ടുള്ള യുദ്ധം കൂടി ആരംഭിച്ചതോടെ മിസൈൽ ഇന്റർസെപ്റ്ററുകൾ വിചാരിച്ചതിലും വേഗത്തിൽ തീർന്നുപോകുന്നതാണ് പെന്റഗണിനെ ആശങ്കപ്പെടുത്തുന്നത്. ഇറാൻ വിടുന്ന നൂറുകണക്കിന് ഡ്രോണുകളെയും മിസൈലുകളെയും പ്രതിരോധിക്കാൻ വൻതോതിൽ ഇത്തരം ആയുധങ്ങൾ ഉപയോഗിക്കേണ്ടി വരുന്നുണ്ട്.
എന്നാൽ ഈ മുന്നറിയിപ്പുകളെ തള്ളിക്കൊണ്ട് ട്രംപ് രംഗത്തെത്തിയിട്ടുണ്ട്. അമേരിക്കയുടെ പക്കൽ ആയുധങ്ങളുടെ വലിയ ശേഖരമുണ്ടെന്നും എത്ര കാലം വേണമെങ്കിലും യുദ്ധം ചെയ്യാനുള്ള കരുത്ത് രാജ്യത്തിനുണ്ടെന്നുമാണ് ട്രംപിന്റെ അവകാശവാദം. പ്രതിരോധ കമ്പനികൾക്ക് കൂടുതൽ ആയുധങ്ങൾ നിർമ്മിക്കാൻ അടിയന്തര ഉത്തരവ് നൽകിയിട്ടുണ്ടെന്നും അദ്ദേഹം ട്രൂത്ത് സോഷ്യലിലൂടെ വ്യക്തമാക്കി. എങ്കിലും സൈനിക വിദഗ്ധരുടെ അഭിപ്രായത്തിൽ, ഇറാനുമായുള്ള സംഘർഷം നീണ്ടുപോയാൽ തന്ത്രപ്രധാനമായ ആയുധങ്ങളുടെ ദൗർലഭ്യം പസഫിക് മേഖലയിലെ സുരക്ഷയെപ്പോലും ബാധിച്ചേക്കാം. നിലവിലെ സാഹചര്യത്തിൽ ആയുധങ്ങൾ പുനസ്ഥാപിക്കാൻ വർഷങ്ങൾ എടുത്തേക്കുമെന്നും ഇത് അമേരിക്കയുടെ ആഗോള സൈനിക കരുത്തിന് വെല്ലുവിളിയാണെന്നും വിശകലന വിദഗ്ധർ ചൂണ്ടിക്കാട്ടുന്നു.
