ബ്രസൽസ്: അമേരിക്കൻ പ്രസിഡന്റ് ഡൊണാൾഡ് ട്രംപ് ഉയർത്തുന്ന വ്യാപാര ഭീഷണികൾക്ക് മുന്നിൽ പതറില്ലെന്നും ശക്തമായ തിരിച്ചടി നൽകുമെന്നും യൂറോപ്യൻ യൂണിയൻ (ഇ.യു) പ്രഖ്യാപിച്ചു. ഗ്രീൻലാൻഡ് വാങ്ങാനുള്ള അമേരിക്കയുടെ നീക്കത്തെ എതിർത്ത എട്ട് യൂറോപ്യൻ രാജ്യങ്ങൾക്ക് മേൽ ട്രംപ് ഇറക്കുമതി തീരുവ പ്രഖ്യാപിച്ച സാഹചര്യത്തിലാണ് ഇ.യു നിലപാട് കടുപ്പിച്ചത്. അമേരിക്കൻ നീക്കം ബ്ലാക്ക്മെയിലിംഗിന് തുല്യമാണെന്ന് വിശേഷിപ്പിച്ച യൂറോപ്യൻ നേതാക്കൾ, ഏകപക്ഷീയമായ ഈ നടപടി ഇരു രാജ്യങ്ങളിലെയും ഉപഭോക്താക്കളെയും ബിസിനസ്സുകളെയും ഒരുപോലെ ബാധിക്കുമെന്ന് മുന്നറിയിപ്പ് നൽകി. ഡെന്മാർക്ക്, സ്വീഡൻ, ഫ്രാൻസ്, ജർമ്മനി, നെതർലാൻഡ്സ്, ഫിൻലാൻഡ് എന്നീ രാജ്യങ്ങൾക്ക് പുറമെ ബ്രിട്ടൻ, നോർവേ എന്നിവർക്കെതിരെയും ട്രംപ് തീരുവ പ്രഖ്യാപിച്ചിട്ടുണ്ട്.
അമേരിക്കയിൽ നിന്നുള്ള 93 ബില്യൺ യൂറോയുടെ ചരക്കുകൾക്ക് മേൽ പ്രത്യാക്രമണമെന്ന നിലയിൽ അധിക നികുതി ചുമത്തുന്ന കാര്യം ഇ.യു ഗൗരവമായി പരിഗണിക്കുന്നുണ്ട്. ഇതിനായി പ്രത്യേക ഉച്ചകോടി വിളിച്ച് ചേർക്കാനും തീരുമാനിച്ചു. ഇതുവരെ പ്രയോഗിക്കാത്ത ‘ആന്റി കൊയേർഷൻ ഇൻസ്ട്രുമെന്റ്’ (ACI) എന്ന കർശന നിയമം ഉപയോഗിച്ച് അമേരിക്കൻ നിക്ഷേപങ്ങൾക്കും ബാങ്കിംഗ് പ്രവർത്തനങ്ങൾക്കും നിയന്ത്രണം ഏർപ്പെടുത്തുന്നതും ആലോചനയിലുണ്ട്. അമേരിക്കൻ ഭീഷണികൾ ആധുനിക വ്യാപാര കരാറുകളുടെ ലംഘനമാണെന്നും തങ്ങളുടെ പരമാധികാരം സംരക്ഷിക്കാൻ ആവശ്യമായ എല്ലാ മുൻകരുതലുകളും സ്വീകരിക്കുമെന്നും യൂറോപ്യൻ കൗൺസിൽ വ്യക്തമാക്കി.
മേഖലയിലെ സമാധാനം തകർക്കുന്ന തരത്തിലുള്ള നീക്കങ്ങളിൽ നിന്ന് ട്രംപ് പിന്മാറണമെന്നും അല്ലെങ്കിൽ ചരിത്രത്തിലെ ഏറ്റവും വലിയ വ്യാപാര യുദ്ധത്തിന് ലോകം സാക്ഷ്യം വഹിക്കേണ്ടി വരുമെന്നും യൂറോപ്യൻ കമ്മീഷൻ വക്താവ് അറിയിച്ചു. അമേരിക്കൻ ഉൽപ്പന്നങ്ങളായ ഹാർലി ഡേവിഡ്സൺ ബൈക്കുകൾ, മദ്യം തുടങ്ങിയവയ്ക്ക് മുൻപ് ഏർപ്പെടുത്തിയ നികുതികൾ പുനഃസ്ഥാപിക്കാനും സാധ്യതയുണ്ട്. നയതന്ത്ര തലത്തിലുള്ള ചർച്ചകൾക്ക് ഇപ്പോഴും സാധ്യതയുണ്ടെങ്കിലും ഭീഷണികൾക്ക് മുന്നിൽ മുട്ടുമടക്കില്ലെന്ന ഉറച്ച സന്ദേശമാണ് യൂറോപ്യൻ യൂണിയൻ ഇപ്പോൾ നൽകുന്നത്.
