ബംഗളൂരു: കോൺഗ്രസ് ഹൈക്കമാൻഡിന്റെ നിർദ്ദേശങ്ങൾക്ക് വിധേയമായും യുവതലമുറയുടെ ആധുനിക ആവശ്യങ്ങൾ മുൻനിർത്തിയും കോൺഗ്രസ് ഭരണത്തിലുള്ള സംസ്ഥാനങ്ങളിൽ പുതിയ വിദ്യാഭ്യാസ നയം രൂപീകരിക്കുന്നതിനായി പാർട്ടി ശക്തമായി പ്രവർത്തിക്കുമെന്ന് കർണാടക മുഖ്യമന്ത്രി ഡി.കെ. ശിവകുമാർ പ്രസ്താവിച്ചു. ബംഗളൂരു റൂറൽ ജില്ലയിലെ ദേവനഹള്ളി ഇൻഡസ്ട്രിയൽ ഏരിയയിൽ സംഘടിപ്പിച്ച രാമയ്യ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് മാനേജ്മെന്റിന്റെ ഉദ്ഘാടനവും നാരായണ പ്രജ്ഞാലയത്തിന്റെ ശിലാസ്ഥാപന ചടങ്ങും നിർവ്വഹിച്ച് സംസാരിക്കുകയായിരുന്നു അദ്ദേഹം.
വിദ്യാഭ്യാസത്തിന് ശേഷം വിദ്യാർത്ഥികൾ കേവലം തൊഴിൽ അന്വേഷകർ മാത്രമായി ഒതുങ്ങിപ്പോകരുതെന്നും, മറിച്ച് പുതിയ തൊഴിലവസരങ്ങൾ സൃഷ്ടിക്കുന്ന വിജയകരമായ സംരംഭകരായി വളരണമെന്നും അദ്ദേഹം കൂട്ടിച്ചേർത്തു. അന്താരാഷ്ട്ര തലത്തിൽ കർണാടകയിലെ വിദ്യാഭ്യാസ മേഖല കൈവരിച്ച നേട്ടങ്ങളെ എടുത്തുപറഞ്ഞ മുഖ്യമന്ത്രി, ലോകമെമ്പാടുമുള്ള എൺപതിലധികം പ്രശസ്ത സർവ്വകലാശാലകൾ കർണാടകയിൽ നിന്നുള്ള വിദ്യാർത്ഥികളെ ഉന്നതപഠനത്തിനായി സ്വീകരിക്കാൻ വലിയ താല്പര്യം പ്രകടിപ്പിക്കുന്നുണ്ടെന്നും വ്യക്തമാക്കി.
