റിയാദ്: സൗദി അറേബ്യയിലെ അൽ-ഹദിത അതിർത്തി വഴി കടത്താൻ ശ്രമിച്ച വലിയ തോതിലുള്ള ലഹരിമരുന്ന് ശേഖരം സകാത്ത്, ടാക്സ് ആൻഡ് കസ്റ്റംസ് അതോറിറ്റി (ZATCA) പിടികൂടി. ഭക്ഷണസാധനങ്ങൾ അടങ്ങിയ വാണിജ്യ ചരക്കുനീക്കത്തിനിടയിൽ ഒളിപ്പിച്ചു കടത്താൻ ശ്രമിച്ച 2,69,411 കാപ്റ്റഗൺ (Captagon) ഗുളികകളാണ് കസ്റ്റംസ് വിഭാഗം കണ്ടെടുത്തത്. സാധാരണ പരിശോധനക്കിടയിൽ അത്യാധുനിക സുരക്ഷാ സാങ്കേതികവിദ്യകൾ ഉപയോഗിച്ചാണ് ഈ ലഹരിക്കടത്ത് തടഞ്ഞതെന്ന് സൗദി പ്രസ് ഏജൻസി റിപ്പോർട്ട് ചെയ്തു.
ലഹരിമരുന്ന് പിടിച്ചെടുത്തതിന് പിന്നാലെ ജനറൽ ഡയറക്ടറേറ്റ് ഓഫ് നാർക്കോട്ടിക് കൺട്രോളുമായി (GDNC) ചേർന്ന് നടത്തിയ അന്വേഷണത്തിൽ, ഈ ചരക്ക് സ്വീകരിക്കാൻ കാത്തുനിന്ന രണ്ട് വ്യക്തികളെ പോലീസ് അറസ്റ്റ് ചെയ്തു. അതിർത്തി സുരക്ഷ കർശനമാക്കുന്നതിലൂടെ നിരോധിത വസ്തുക്കളിൽ നിന്ന് സമൂഹത്തെ സംരക്ഷിക്കുക എന്നത് തങ്ങളുടെ പ്രധാന തന്ത്രപരമായ ലക്ഷ്യമാണെന്ന് അതോറിറ്റി വക്താവ് ഹമൂദ് അൽ ഹർബി വ്യക്തമാക്കി. ലഹരിക്കടത്ത് സംബന്ധിച്ച വിവരങ്ങൾ 1910 എന്ന നമ്പറിലോ ഇമെയിൽ വഴിയോ രഹസ്യമായി അറിയിക്കാൻ പൊതുജനങ്ങളോട് അദ്ദേഹം അഭ്യർഥിച്ചു. കൃത്യമായ വിവരങ്ങൾ നൽകുന്നവർക്ക് സാമ്പത്തിക പാരിതോഷികം നൽകുമെന്നും അതോറിറ്റി അറിയിച്ചിട്ടുണ്ട്.
