ടെഹ്റാൻ: ഇറാന്റെ ഇന്റലിജൻസ് മന്ത്രി ഇസ്മായിൽ ഖത്തീബിനെ ഇസ്രായേൽ വധിച്ചതിന് പിന്നാലെ, അമേരിക്കയ്ക്കും ഇസ്രായേലിനുമെതിരെ അതിശക്തമായ യുദ്ധം തുടരുമെന്ന് പ്രഖ്യാപിച്ച് ഇറാനിയൻ റെവല്യൂഷണറി ഗാർഡ് കോർപ്സ് (IRGC). ഇറാന്റെ ഇന്റലിജൻസ് വിഭാഗം പുറപ്പെടുവിച്ച പ്രസ്താവനയിൽ, “സയണിസ്റ്റ്-അമേരിക്കൻ ഭീകര നേതാക്കൾക്കെതിരെയുള്ള” പോരാട്ടം അവസാന ശ്വാസം വരെ തുടരുമെന്ന് ഇവർ മുന്നറിയിപ്പ് നൽകി. തസ്നീം വാർത്താ ഏജൻസി റിപ്പോർട്ട് ചെയ്ത പ്രസ്താവന പ്രകാരം, ഈ ‘അവസാന യുദ്ധത്തിൽ’ ചൊരിയപ്പെട്ട രക്തസാക്ഷികളുടെ പരിശുദ്ധ രക്തം അധിനിവേശക്കാരായ അമേരിക്കയ്ക്കും സയണിസ്റ്റുകൾക്കും നാശം വിതയ്ക്കുമെന്ന് ഐആർജിസി വ്യക്തമാക്കി.
ഇറാന്റെ സൈനിക-സുരക്ഷാ മേഖലയിലെ ഏറ്റവും പ്രധാനപ്പെട്ട വ്യക്തികളിൽ ഒരാളായ ഇസ്മായിൽ ഖത്തീബിന്റെ വധം മേഖലയിലെ സംഘർഷം കൂടുതൽ വഷളാക്കിയിട്ടുണ്ട്. ഇസ്രായേലിന്റെയും അമേരിക്കയുടെയും നേതൃത്വത്തിനെതിരെ ഒളിഞ്ഞും തെളിഞ്ഞും രഹസ്യാന്വേഷണ-സുരക്ഷാ പോരാട്ടം തുടരുമെന്നും, തങ്ങളുടെ ലക്ഷ്യങ്ങൾ കൈവരിക്കുന്നത് വരെ പിന്മാറില്ലെന്നുമാണ് ഇറാന്റെ നിലപാട്. ഇറാന്റെ ഉന്നത നേതൃത്വത്തെ ലക്ഷ്യം വെച്ച് ഇസ്രായേൽ നടത്തുന്ന വധശിക്ഷകൾക്ക് തിരിച്ചടിയായി ഗൾഫ് മേഖലയിലുടനീളം തങ്ങളുടെ ആക്രമണ പരമ്പരകൾ ശക്തമാക്കാനാണ് ഇറാൻ പദ്ധതിയിടുന്നത്. പശ്ചിമേഷ്യയിലെ യുദ്ധം പുതിയ തലത്തിലേക്ക് നീങ്ങുന്നതിന്റെ സൂചനയായാണ് ഈ പ്രസ്താവനയെ അന്താരാഷ്ട്ര നിരീക്ഷകർ കാണുന്നത്.
