കുവൈത്ത് സിറ്റി: യു.എസ് – ഇറാൻ സംഘർഷത്തിനിടയിൽ കുവൈത്ത് അന്താരാഷ്ട്ര വിമാനത്താവളത്തിന് നേരെ ഉണ്ടായ മിസൈൽ-ഡ്രോൺ ആക്രമണത്തിൽ പരിക്കേറ്റ് വിവിധ ആശുപത്രികളിൽ ചികിത്സയിൽ കഴിയുന്ന ഇന്ത്യൻ പൗരന്മാരെ കുവൈത്തിലെ ഇന്ത്യൻ സ്ഥാനപതി പരാമിത ത്രിപാഠി സന്ദർശിച്ചു. കഴിഞ്ഞ ആഴ്ച വിമാനത്താവളത്തിലെ ടെർമിനൽ ഒന്നിന് നേരെ ഇറാൻ നടത്തിയ വ്യോമാക്രമണത്തിലാണ് ഒരു ഇന്ത്യൻ സ്വദേശി കൊല്ലപ്പെടുകയും പതിമൂന്നോളം ഇന്ത്യക്കാർക്ക് പരിക്കേൽക്കുകയും ചെയ്തത്. പരിക്കേറ്റവർക്ക് ആവശ്യമായ എല്ലാ നയതന്ത്ര സഹായങ്ങളും കൃത്യമായ പരിചരണവും ഉറപ്പാക്കാൻ എംബസി ഉദ്യോഗസ്ഥർ നിരന്തരം ആശുപത്രി അധികൃതരുമായി ബന്ധപ്പെടുന്നുണ്ടെന്ന് സന്ദർശനത്തിന് ശേഷം സ്ഥാനപതി അറിയിച്ചു.
ആക്രമണത്തിൽ പരിക്കേറ്റ 13 ഇന്ത്യൻ പൗരന്മാരിൽ ഒൻപത് പേരും ഇതിനകം തന്നെ സുഖം പ്രാപിച്ച് ആശുപത്രി വിട്ടിട്ടുണ്ട്. നിലവിൽ 4 ഇന്ത്യക്കാരാണ് ജാബർ ആശുപത്രി ഉൾപ്പെടെയുള്ള വിവിധ കേന്ദ്രങ്ങളിൽ തുടർചികിത്സയിൽ കഴിയുന്നത്. ഇവരുടെ ആരോഗ്യനില തൃപ്തികരമാണെന്നും ആശങ്കപ്പെടേണ്ട സാഹചര്യമില്ലെന്നും മെഡിക്കൽ സംഘം വ്യക്തമാക്കി. പരിക്കേറ്റവരുടെ കുടുംബങ്ങളുമായി ഇന്ത്യൻ എംബസി നിരന്തരം സമ്പർക്കം പുലർത്തുന്നുണ്ട്. ആക്രമണത്തിൽ ജീവൻ നഷ്ടപ്പെട്ട ഇന്ത്യൻ സ്വദേശിയുടെ ഭൗതികശരീരം ഔദ്യോഗിക നടപടികൾ വേഗത്തിലാക്കി എത്രയും പെട്ടെന്ന് നാട്ടിലെത്തിക്കാൻ കുവൈത്ത് ക്രിമിനൽ എവിഡൻസ് ഡിപ്പാർട്ട്മെന്റ് ജനറൽ മാനേജർ ബ്രിഗേഡിയർ അബ്ദുൽറഹീം അൽ അവാദിയുമായി സ്ഥാനപതി നേരിട്ട് കൂടിക്കാഴ്ച നടത്തിയിരുന്നു. കുവൈത്ത് അധികൃതർ നൽകുന്ന അടിയന്തരവും സവിശേഷവുമായ പിന്തുണയ്ക്ക് ഇന്ത്യൻ എംബസി നന്ദി രേഖപ്പെടുത്തി.
മേഖലയിൽ സാധാരണക്കാരെയും വിമാനത്താവളം പോലുള്ള പൊതുസംവിധാനങ്ങളെയും ലക്ഷ്യമിട്ട് തുടർച്ചയായി നടക്കുന്ന ആക്രമണങ്ങളെ ഇന്ത്യൻ വിദേശകാര്യ മന്ത്രാലയം ശക്തമായ ഭാഷയിൽ അപലപിച്ചു. ഇത്തരം അക്രമങ്ങൾ അടിയന്തരമായി അവസാനിപ്പിക്കണമെന്നും സമാധാനം പുനഃസ്ഥാപിക്കണമെന്നും ഇന്ത്യ അന്താരാഷ്ട്ര സമൂഹത്തോട് ആവശ്യപ്പെട്ടിട്ടുണ്ട്. പശ്ചിമേഷ്യൻ പ്രതിസന്ധി ആരംഭിച്ചതിനുശേഷം വിവിധ സംഭവങ്ങളിലായി ഇതുവരെ പത്തിലധികം ഇന്ത്യൻ പൗരന്മാർക്കാണ് ജീവൻ നഷ്ടമായിട്ടുള്ളത്. മേഖലയിൽ ജോലി ചെയ്യുന്ന ലക്ഷക്കണക്കിന് പ്രവാസികളുടെ സുരക്ഷ ഉറപ്പാക്കാൻ വിദേശകാര്യ മന്ത്രാലയത്തിന്റെ നേതൃത്വത്തിൽ അതീവ ജാഗ്രതയോടെയുള്ള നിരീക്ഷണങ്ങളാണ് നിലവിൽ നടത്തിവരുന്നത്.
