ടെഹ്റാൻ: ഹോർമുസ് കടലിടുക്ക് തുറക്കുന്നതുമായി ബന്ധപ്പെട്ട് അമേരിക്കൻ പ്രസിഡന്റ് ഡൊണാൾഡ് ട്രംപ് നൽകിയ അന്ത്യശാസനം അവസാനിക്കാൻ മണിക്കൂറുകൾ മാത്രം ബാക്കിനിൽക്കെ, കടുത്ത പ്രത്യാക്രമണ നിലപാടുമായി ഇറാൻ പ്രസിഡന്റ് മസൂദ് പെസെഷ്കിയാൻ. രാജ്യം ഒരു യുദ്ധത്തിലേക്ക് നീങ്ങുകയാണെങ്കിൽ താനുൾപ്പെടെയുള്ളവർ ജീവൻ ബലിയർപ്പിക്കാൻ (രക്തസാക്ഷിത്വത്തിന്) സന്നദ്ധരാണെന്ന് അദ്ദേഹം പ്രഖ്യാപിച്ചു. ട്രംപിന്റെ ‘നരകതുല്യമായ’ ഭീഷണികൾക്കും അന്ത്യശാസനങ്ങൾക്കും മുന്നിൽ ഇറാൻ ഭയപ്പെടില്ലെന്നും, രാജ്യത്തിന്റെ പരമാധികാരവും താല്പര്യങ്ങളും സംരക്ഷിക്കുന്നതിൽ വിട്ടുവീഴ്ചയുണ്ടാകില്ലെന്നും അദ്ദേഹം വ്യക്തമാക്കി. സന്നദ്ധപ്രവർത്തകരും സൈന്യവും ഉൾപ്പെടെയുള്ള വലിയൊരു വിഭാഗം ജനങ്ങൾ മാതൃരാജ്യത്തിനായി പോരാടാൻ തയ്യാറായിക്കഴിഞ്ഞുവെന്നും അദ്ദേഹം കൂട്ടിച്ചേർത്തു.
ഇറാനിലെ വൈദ്യുതി നിലയങ്ങളും അടിസ്ഥാന സൗകര്യങ്ങളും തകർക്കുമെന്ന ട്രംപിന്റെ പ്രസ്താവന അന്താരാഷ്ട്ര നിയമങ്ങളുടെ നഗ്നമായ ലംഘനമാണെന്ന് ഇറാൻ ആവർത്തിച്ചു. സിവിലിയൻ കേന്ദ്രങ്ങളെ ലക്ഷ്യം വെക്കുന്നത് യുദ്ധക്കുറ്റമാണെന്നും ഇതിനെതിരെ ലോകരാഷ്ട്രങ്ങൾ പ്രതികരിക്കണമെന്നും ഇറാൻ ആവശ്യപ്പെട്ടു. ഹോർമുസ് കടലിടുക്ക് വഴി തടഞ്ഞതിലൂടെ ഉണ്ടായ സാമ്പത്തിക നഷ്ടത്തിന് അമേരിക്കയിൽ നിന്ന് നഷ്ടപരിഹാരം ലഭിക്കണമെന്ന നിലപാടിൽ ഇറാൻ ഉറച്ചുനിൽക്കുകയാണ്. ചൊവ്വാഴ്ച രാത്രി എട്ട് മണിയോടെ ട്രംപ് നൽകിയ സമയപരിധി അവസാനിക്കാനിരിക്കെ, മേഖലയിൽ വൻതോതിലുള്ള സൈനിക വിന്യാസമാണ് നടക്കുന്നത്. ഏതു നിമിഷവും ഒരു യുദ്ധം പൊട്ടിപ്പുറപ്പെട്ടേക്കാമെന്ന ഭീതിയിൽ അന്താരാഷ്ട്ര സമൂഹം അതീവ ജാഗ്രതയിലാണ്.
