ശ്രീനഗർ: ജമ്മു കശ്മീരിലെ വിഖ്യാത വിനോദസഞ്ചാര കേന്ദ്രമായ ഗുൽമാർഗിൽ കേബിൾ കാർ സംവിധാനമായ ‘ഗൊണ്ടോള’യിൽ സാങ്കേതിക തകരാർ സംഭവിച്ച് മുന്നൂറോളം വിനോദസഞ്ചാരികൾ ആകാശത്ത് കുടുങ്ങി. ഇന്ന് ഉച്ചയ്ക്ക് ഒരു മണിയോടെയാണ് ഗൊണ്ടോള സർവീസിന്റെ രണ്ട് ഘട്ടങ്ങളിലും തകരാർ ഉണ്ടായത്. അറുപത്തിയഞ്ചോളം ക്യാബിനുകളിലായി യാത്ര ചെയ്തിരുന്ന വിനോദസഞ്ചാരികളിൽ ചിലർ ഏകദേശം 500 അടി ഉയരത്തിലാണ് കുടുങ്ങിക്കിടന്നത്. കനത്ത മഴയും പ്രതികൂല കാലാവസ്ഥയും വകവെക്കാതെ മണിക്കൂറുകൾ നീണ്ട പരിശ്രമത്തിനൊടുവിൽ വിനോദസഞ്ചാരികളെ മുഴുവൻ സുരക്ഷിതമായി താഴെയെത്തിക്കാൻ രക്ഷാപ്രവർത്തകർക്ക് സാധിച്ചു.
സംസ്ഥാന ദുരന്ത നിവാരണ സേന, ദേശീയ ദുരന്ത നിവാരണ സേന, ഇന്ത്യൻ സൈന്യത്തിന്റെ ചിനാർ കോർപ്സ്, ബി.എസ്.എഫ്, ജമ്മു കശ്മീർ പോലീസ് എന്നിവർ സംയുക്തമായാണ് രക്ഷാദൗത്യം നയിച്ചത്. ആദ്യ അഞ്ച് മണിക്കൂറിനുള്ളിൽ തന്നെ ഇരുനൂറോളം പേരെ രക്ഷപ്പെടുത്താൻ സംഘത്തിന് കഴിഞ്ഞു. സംഭവത്തെത്തുടർന്ന് കശ്മീർ മുഖ്യമന്ത്രി ഒമർ അബ്ദുള്ളയും ലെഫ്റ്റനന്റ് ഗവർണർ മനോജ് സിൻഹയും സ്ഥിതിഗതികൾ നേരിട്ട് നിരീക്ഷിച്ചു. വിനോദസഞ്ചാരികൾ പരിഭ്രാന്തരാകേണ്ടതില്ലെന്നും പരിശീലനം ലഭിച്ച സംഘം സ്ഥലത്തുണ്ടെന്നും മുഖ്യമന്ത്രി എക്സിലൂടെ അറിയിച്ചു. സൈന്യത്തിന്റെ നേതൃത്വത്തിൽ നടന്ന ഏകോപിത ഇടപെടലിലൂടെ വൻ ദുരന്തമാണ് ഒഴിവായത്.
ഗുൽമാർഗ് ഗൊണ്ടോളയിൽ മുൻപും സമാനമായ അപകടങ്ങൾ റിപ്പോർട്ട് ചെയ്തിട്ടുള്ളത് വിനോദസഞ്ചാരികൾക്കിടയിൽ വലിയ ആശങ്കയുണ്ടാക്കുന്നുണ്ട്. 2017-ൽ മരം വീണ് ക്യാബിൻ തകർന്ന് ഏഴ് പേർ മരിച്ചതും, 2024 ജനുവരിയിൽ സാങ്കേതിക തകരാർ മൂലം സർവീസ് നിർത്തിവെച്ചതും ഇതിന് മുൻപുള്ള ഉദാഹരണങ്ങളാണ്. തിങ്കളാഴ്ച നടന്ന സംഭവത്തിൽ ആർക്കും പരിക്കുകളോ ആളപായമോ റിപ്പോർട്ട് ചെയ്തിട്ടില്ല എന്നത് വലിയ ആശ്വാസമാണ്. കേബിൾ കാർ സംവിധാനത്തിന്റെ അറ്റകുറ്റപ്പണികൾ നിലവിൽ പുരോഗമിക്കുകയാണെന്നും സുരക്ഷാ പരിശോധനകൾക്ക് ശേഷമേ സർവീസ് പുനരാരംഭിക്കുകയുള്ളൂവെന്നും അധികൃതർ അറിയിച്ചു.
