കോഴിക്കോട്: സഹോദരന്റെ അപ്രതീക്ഷിത വിയോഗവാർത്തയറിഞ്ഞ് വീട്ടിലെത്തിയ സഹോദരി കുഴഞ്ഞുവീണ് മരണമടഞ്ഞു. കോഴിക്കോട് ഫ്രാൻസിസ് റോഡ് മനന്തലപ്പാലം സ്വദേശി പി.ടി. നാസർ (50), അദ്ദേഹത്തിന്റെ സഹോദരിയും വെസ്റ്റ് മാങ്കാവ് സ്വദേശിനിയുമായ നസീമ (47) എന്നിവരാണ് മണിക്കൂറുകളുടെ മാത്രം വ്യത്യാസത്തിൽ മരണത്തിന് കീഴടങ്ങിയത്. ഇന്ന് രാവിലെയാണ് നാസർ മരണപ്പെട്ടത്. ഈ ദുഃഖവാർത്തയറിഞ്ഞ് ഉടൻ തന്നെ നാസറിന്റെ ഫ്രാൻസിസ് റോഡിലെ വീട്ടിലേക്ക് ഓടിയെത്തിയ നസീമ, അവിടെ വെച്ച് പെട്ടെന്ന് കുഴഞ്ഞുവീഴുകയായിരുന്നു. ഉടൻതന്നെ സമീപത്തെ സ്വകാര്യ ആശുപത്രിയിൽ എത്തിച്ച് അടിയന്തര ചികിത്സ നൽകിയെങ്കിലും ജീവൻ രക്ഷിക്കാനായില്ല.
മരണമടഞ്ഞ നാസറിന്റെ ഭാര്യ തെസ്നിയാണ്. സിയ ഫാത്തിമ, ഹയ ഫാത്തിമ എന്നിവർ മക്കളാണ്. മമ്മദ് കോയ, മൊയ്തീൻ കോയ എന്നിവരും പരേതരായ ആലിക്കോയ, സിദ്ദീഖ് എന്നിവരുമാണ് മറ്റുള്ള സഹോദരങ്ങൾ. ചന്ദ്രിക ദിനപത്രം ജീവനക്കാരനും പന്നിയങ്കര മേഖല മുസ്ലിം ലീഗ് ജനറൽ സെക്രട്ടറിയുമായ വെസ്റ്റ് മാങ്കാവ് എം.വി. നജീബാണ് അന്തരിച്ച നസീമയുടെ ഭർത്താവ്. ദഹബീന, യൂത്ത് ലീഗ് പന്നിയങ്കര മേഖല ട്രഷറർ മുഹമ്മദ് യാസിം, എം.എസ്.എഫ് സൗത്ത് മണ്ഡലം സെക്രട്ടറി നഷ്വിൻ നവ്വാഫ് എന്നിവർ മക്കളും, ഹാരിസ് ചേളാരി മരുമകനുമാണ്. ഒരേദിവസം മണിക്കൂറുകളുടെ ഇടവേളയിൽ വിടപറഞ്ഞ ഇരു സഹോദരങ്ങളുടെയും കബറടക്കം ബന്ധുക്കളുടെയും നാട്ടുകാരുടെയും സാന്നിധ്യത്തിൽ കണ്ണംപറമ്പ് ജുമാമസ്ജിദ് കബർസ്ഥാനിൽ വെച്ച് നടത്തി.
